﻿Hopa.
11.
Anō rā ko Topara Naamati, i mea ia: 
“Kaua rānei hei whakautua te tini o ngā kupu, ā, e whakatikaia rānei te tangata ngutu hohoro? 
Mā āu kupu whakapehapeha rānei e nohopuku ai ngā tāngata, ā, ina tāwai koe, kaua rānei he tangata e mea i a koe kia whakamā? 
E mea ana hoki koe, ‘He tino tika tāku whakaako, ā, he mā ahau ki ōu kanohi.’ 
Auē, me i kōrero te Atua, me i puaki mai ōna ngutu ki te whakahē i a koe! 
Me i whakaaturia mai e ia ki a koe ngā mea ngaro o te mātauranga, te huhua o ngā ara o tāna mahi! Nā, kia mātau koe: he iti iho i ōu hē tā te Atua e tango nei i a koe. 
“Ina whakatakina e koe, e kitea rānei e koe te Atua? E tino kitea rawatia rānei e koe te Kaha Rawa? 
Kei te rangi te tiketike; ka pēhea koe? Hōhonu iho i te rēinga; ko te aha e mōhiotia e koe? 
Ko tōna takoto, roa atu i te whenua, whānui atu i te moana. 
“Ki te mea ka haukotia e ia, ka hereherea rānei, ka whakawākia rānei, mā wai ia e ārai? 
E mōhio ana hoki ia ki ngā tāngata teka noa; ā, e kite ana ia i te hē, ahakoa e kore e whakaaroa e ia. 
Otiia, ko te mea whakaarokore nei, ko te tangata kāhore rawa ōna hinengaro, āe rā, tō te tangata rite i tōna whānautanga kei te kūao kāihe mohoao. 
“Ki te whakatikaia e koe tōu ngākau, ā, ka wherahia ōu ringa ki a ia; 
ki te mea he hē kei tōu ringa, whakamataratia atu, kaua hoki te kino e noho ki ōu tapenākara. 
He pono ko reira ara ai tōu mata, tē ai he ira; āe, ka ū hoki koe, tē ai he wehi. 
Tērā hoki koe e wareware ki tōu māuiui; ā, e maharatia e koe ānō ko ngā wai kua rere atu. 
Ā, ko tōu ora tērā e mārama kē atu i tō te poutūmārōtanga o te rā; ā, ahakoa e pōuri anō, ka rite ki te ata. 
Ka tatū ōu whakaaro, nō te mea ka whai tūmanakohanga atu; āe, ka rapu koe i tētahi taha ōu, i tētahi taha, ā, ka takoto mārire koe. 
E takoto iho anō koe, tē ai he kaiwhakawehi; he tokomaha anō hoki e whai kia paingia e koe. 
Ka poko ia ngā kanohi o te hunga kino, kore ake he rerenga mō rātou; ko tā rātou e tūmanako atu ai ko te hemonga.” 
