﻿Hopa.
12.
Nā, ka whakautu a Hopa, ka mea: 
“He tika rawa ko koutou ngā tāngata, ā, ka mate tahi atu te whakaaro nui me koutou. 
Otirā, kei ahau anō hoki he ngākau he pērā anō me o koutou, kīhai ahau i hoki iho i a koutou. Ko wai rā te hē ana ki ēnei mea? 
“Tōku rite kei te tangata e waiho ana hei kata mā tōna hoa, he tangata e karanga ana ki te Atua, ā, whakarongo mai ana tērā ki a ia; e waiho ana te mea tika, te mea tapatahi, hei kata. 
Kei roto i te whakaaro o te tangata, e tau ana tāna noho, te whakahāwea ki te aituā; e tauwhanga ana tēnā ki te hunga e paheke ana te waewae. 
Kei te rangatira ngā tēneti o ngā kaipāhua, ā, noho kore wehi ana te hunga e whakapātaritari ana ki te Atua; he ope noa mai hoki tā te Atua ki ō rātou ringa. 
“Tēnā rā, ui atu ki ngā kararehe mā rātou koe e whakaako; ki ngā manu o te rangi, mā rātou e kōrero ki a koe; 
kōrero atu rānei ki te whenua, ā, māna koe e whakaako; ka whakaaturia mai anō hoki ki a koe e ngā ika o te moana. 
Ko wai i kore te mōhio ki ēnei mea katoa, he mea mahi tēnei nā te ringa o Ihowā? 
Kei tōna ringa nei te wairua o ngā mea ora katoa, te manawa hoki o ngā kikokiko tāngata katoa. 
He teka ianei e whakamātauria ana ngā kupu e te taringa, pērā hoki i te waha e whakarongo nei ki te reka o tāna kai? 
Kei ngā kaumātua ngā whakaaro nui; kei te roa o ngā rā te mātau. 
“Kei a ia te whakaaro nui me te kaha; kei a ia te tohutohu me te mātauranga. 
Nanā, e wāwāhia ana e ia, kore iho e hangā anō; e kopia ana e ia te tangata, kāhore rawa he putanga. 
Nanā, e unuhia atu ana e ia ngā wai, ā, kua maroke; e tukua mai ana anō e ia, ā, ka hurihia te whenua. 
Kei a ia te kaha me te mahi tōtika; ko te tangata tinihanga, me te tangata e tinihangatia ana, nāna. 
E kāhakina atu ana e ia ngā kaiwhakatakoto whakaaro, he mea pāhua; whakakūwaretia iho e ia ngā kaiwhakawā. 
Ko te mana o ngā kīngi, wetekina ake e ia, herea iho e ia ō rātou hope ki te whītiki. 
E ārahina atu ana e ia ngā tohunga, he mea pāhua, hurihia iho e ia te hunga kaha. 
Whakakorea ake e ia he kupu mā te hunga ngākau pono, riro ana i a ia ngā mahara o ngā kaumātua. 
E ringihia ana e ia te whakahāwea ki runga ki ngā rangatira, e wetekina ana e ia te whītiki o te hunga kaha. 
E hurahia mai ana e ia ngā mea hōhonu i roto i te pōuri, whakaputaina mai ana e ia te ātārangi o te mate ki te mārama. 
E whakanuia ana e ia ngā iwi, ā, e hunā ana e ia; e tohatohaina atu ana e ia ngā iwi, ā, e whakawhāititia mai ana anō rātou e ia. 
E tangohia atu ana e ia te ngākau o ngā rangatira o te iwi o te whenua, ā, e meinga ana e ia kia kōpikopiko noa i te wāhi ururua kāhore nei he ara. 
Whāwhā noa rātou i roto i te pōuri, kāhore hoki he mārama, ā, meinga ana rātou e ia kia hūrori haere ānō he tangata haurangi.” 
