﻿Hopa.
16.
Kātahi a Hopa ka whakautu, ka mea: 
“Ka maha ngā mea pēnā kua rangona nei e ahau; he kaiwhakamārie haumaruru rawa koutou katoa. 
E whai mutunga rānei ngā kupu tikangakore? Nā te aha rānei koe i whakaoho ki te whakahoki kupu mai? 
E taea anō e ahau te kōrero pēnā i a koutou; me i pēnei tō koutou wairua me tōku wairua; hono tonu āku kupu ki a koutou, ka rūrū anō tōku upoko ki a koutou. 
E whakakaha anō ia tōku māngai i a koutou, ka ai anō hoki te whakamārie a ōku ngutu hei pēhi i tō koutou mamae. 
“Ahakoa kōrero ahau, kāhore tōku pōuri e iti iho; ki te mutu tāku, ko tēhea wāhi o tōku mamae ka tāharahara iho? 
Ināianei anō kua meinga ahau e ia kia ruha; mōtī iho i a koe tōku whakaminenga katoa. 
Nā, kua mau kita koe ki ahau, hei kaiwhakaatu i tōku hē; e whakatika ana mai hoki tōku hīrokitanga ki ahau, hei whakapuaki i tōku hē. 
Haehaea ana ahau e ia i a ia e riri ana, e tūkino ana ia i ahau; pakiri ana ōna niho ki ahau; e whakakoi mai ana tōku hoariri i ōna kanohi ki ahau. 
Hāmama mai ana ō rātou māngai ki ahau; whakahāwea mai ana, kei te papaki rātou i tōku pāpāringa; huihui ana rātou kia kotahi hei whawhai ki ahau. 
Kua tukua ahau e te Atua ki te hunga hē, whakarērea pūtia ana ahau ki ngā ringa o te hunga kino. 
Hūmārie ana tāku noho, heoi kua wāwāhi ia i ahau; kua mau ia ki tōku kakī, tātātia ake ahau kia pakaru rikiriki; whakatūria ana ahau e ia hei kōperenga pere māna. 
Karapotia ana ahau e āna kaikōpere, motumotuhia ana e ia ōku whatumanawa, kāhore hoki e tohungia; ringihia ana e ia tōku au ki te whenua. 
He mea wāwāhi ahau nāna, he wāhanga, he wāhanga; ānō he tangata kaha ia e rere mai ana ki runga ki ahau. 
“Tuituia ana e ahau he kākahu taratara mō tōku kiri, whakaititia iho e ahau tōku haona ki te puehu. 
Paruparu noa iho tōku mata i te tangihanga, kei runga i ōku kamo te ātārangi o te mate; 
ahakoa kāhore he tutū i ōku ringa, ā, he mā tāku īnoi. 
“Kaua, e te whenua, e hīpokina ōku toto, kei whai wāhi tānga anō hoki tāku karanga. 
Kei te rangi nei anō ināianei te kaiwhakaatu o tāku, kei te wāhi i runga tōku kaititiro. 
E tāwai mai ana ōku hoa ki ahau, māturuturu tonu ia ngā roimata o tōku kanohi ki te Atua. 
Kia tohe koa ia i tō te tangata tika ki te Atua, i tō te tama hoki a te tangata ki tōna hoa! 
“Kia taka mai hoki ngā tau torutoru nei, ka haere ahau i te ara e kore ai ahau e hoki mai anō.” 
