﻿Hopa.
18.
Anō rā ko Pirirara Huhi, i mea ia: 
“Kia pēhea te roa o tā koutou whakatakoto māhanga mō ngā kupu? Kia whai mahara mai, muri iho ka kōrero mātou. 
He aha mātou i kīia ai he kararehe, i waiho ai hei mea poke ki tā koutou titiro mai? 
Haea iho koe e koe anō, i a koe e riri ana – māu koia ka mahue ai te whenua, ka nekehia ai te toka i tōna wāhi? 
“E pirau anō hoki te rama a te hunga kino, ā, e kore te mura o tāna ahi e mārama. 
Ka pōuri te mārama i roto i tōna tēneti, ka pirau anō hoki tāna rama i runga i a ia. 
Ka whakakīkītia ngā takahanga o tōna kaha, ka kōkiritia iho anō ia ki raro e tōna whakaaro ake. 
Nō te mea ka makā ia e ōna waewae ake ki te kupenga, ka haere hoki ia i runga i te reti. 
Ka mau tōna rekereke i te tawhiti, ā, ka hopukia ia e te māhanga. 
Kei te huna ki te whenua te aho mōna, te rore hoki mōna ki te huarahi. 
He whakamataku i ngā taha katoa hei mea i a ia kia wehi, hei aruaru hoki i a ia i ōna hikitanga rekereke. 
Ko tōna kaha ka hemo i te kai, ā, kei te whanga tonu te aituā ki tōna tatunga. 
Ka pau i tērā ngā wāhi o tōna tinana, āe, ka pau ōna wāhi i te mātāmua o te mate. 
Ka hūtia atu ia i roto i tōna tēneti, i whakamanawa ai ia, ā, ka kawea atu ia ki te kīngi o ngā whakamataku. 
Nā, ka noho ki tōna tēneti te mea ehara nei i a ia; ā, ka ruia iho te whānāriki ki runga ki tōna kāinga. 
Ka maroke ake ōna pakiaka i raro, ā, i runga ka tapahia atu tōna manga. 
Ka ngaro atu te maharatanga ki a ia i runga i te whenua; e kore anō ia e whai ingoa i te huanui. 
Ka peia atu anō ia i roto i te mārama ki te pōuri, ka atiatia atu hoki i te ao. 
E kore ia e whai tama, e whai tama rānei a te tama, i roto i tōna iwi, he mōrehu rānei i te wāhi i noho ai ia. 
Mīharo ana ki tōna rā te hunga i muri i a ia, pērā i te hunga i haere rā i mua, mau ana tō rātou wehi. 
He pono ko ngā nohoanga ēnei o te tangata kino, ko te wāhi hoki tēnei o te tangata kāhore e mōhio ki te Atua.” 
