﻿Hopa.
29.
Ā, i kōrero tonu a Hopa i tāna pepeha, i mea: 
“Auē, me i rite ki ngā marama ō mua, ki ngā rā i tiaki ai te Atua i ahau! 
I tīaho mai ai tāna rama ki tōku mātenga, ā, nā tāna whakamārama i haere ai ahau i te pōuri; 
me i pērā anō me ahau i ngā rā o tōku taiohitanga, i te mea nei kei runga tō te Atua whakaaro puku i tōku tēneti; 
i te mea e noho ana anō te Kaha Rawa i ahau, ā, kei tētahi taha ōku āku tamariki, kei tētahi taha; 
i horoia ai ōku takahanga ki te pata, ā, rere mai ana ngā awa hinu ki ahau i roto i te kōhatu! 
“I tōku haerenga atu ki te kūwaha ki te pā, ā, whakapai ana i te nohoanga mōku i te waharoa, 
ka kite ngā taitamariki i ahau, ā, piri ana rātou; whakatika ana ngā koroheke, tū ana ki runga; 
mutu pū te kōrero a ngā tino tāngata, kua kōpania te ringa ki ō rātou māngai; 
ngaro ana te reo o ngā rangatira, piri ana ō rātou arero ki ō rātou ngao. 
Nō te rongonga hoki o te taringa i ahau, manaaki ana i ahau; te kitenga o te kanohi i ahau, whakaae mai ana ki āku mahi; 
nō te mea nāku i whakaora te rawakore i a ia e karanga ana, te pani me te tangata hoki kāhore nei ōna kaiāwhina. 
I tau ki runga ki ahau te manaaki a te tangata e tata ana ki te whakangaromanga; harakoa ana i ahau te ngākau o te pouaru. 
I kākahuria e ahau te tika, ā, ko tērā tōku kākahu; e rite ana tāku whakarite whakawā he koroka, he karauna. 
He kanohi ahau ki te matapō, he waewae ki te kopa. 
He matua ahau ki ngā rawakore; ā, i āta rapua e ahau te tikanga o te totohe a te tangata kīhai nei ahau i mōhio. 
Wāwāhia ana e ahau ngā kauae o te tangata kino, ā, tākiritia mai ana e ahau tāna mea pāhua i roto i ōna niho. 
“Kātahi ahau ka mea, ‘Tērā ahau e mate i roto i tōku ōhanga; ka whakanuia ōku rā kia rite ki te onepū te maha. 
Ko tōku pakiaka tautoro tonu ki ngā wai, ā, i te pō tau ana te tōmairangi ki runga ki tōku peka; 
ko tōku korōria hou tonu i roto i ahau, ā, hoki ake ana te kaha o tāku kōpere i tōku ringa.’ 
“I whakarongo mai ngā tāngata ki ahau, i tatari, whakarongo puku ana rātou i ahau e whakatakoto whakaaro ana. 
I muri i āku kupu kore ake rātou kōrero anō; māturuturu iho ana āku kupu ki runga ki a rātou. 
I tāria mai ahau e rātou ānō ko te ua; hāmama mai ana ō rātou māngai ānō e tatari ana ki te ua ō muri. 
Ka kata ahau ki a rātou, kīhai i whakaponohia e rātou; kīhai hoki rātou i whakataka i te mārama o tōku mata. 
Nāku tō rātou ara i whiriwhiri, ā, noho ana ahau hei rangatira, noho ana hoki ahau ānō he kīngi i roto i te ope i rite ahau ki te kaiwhakamārie o te hunga e tangi ana. 
