﻿Waiata.
5.
Ki te tino kaiwhakatangi Nehiroto. He hīmene nā Rāwiri. Tahuri tōu taringa, e Ihowā, ki āku kupu, kia mōhio koe ki tōku whakaaroaronga. 
Whakarongo ki te reo o tāku karanga, e tōku Kīngi, e tōku Atua, he īnoi hoki tāku ki a koe. 
E rongo koe ki tōku reo, e Ihowā, i te ata; i te ata ka whakatikaia atu e ahau tāku īnoi ki a koe, ā, ka titiro matatau atu. 
Ehara hoki koe i te Atua e pai ana ki te hara, e kore te kino e noho ki a koe. 
E kore te hunga wairangi e tū ki tōu aroaro; e kinongia ana e koe ngā kaimahi katoa i te kino. 
E ngaro i a koe te hunga kōrero teka; e whakarihariha ana a Ihowā ki te tangata toto, ki te tangata hīanga. 
Ko ahau ia ka haere i runga i te tini o āu atawhai ki tōu whare; ka koropiko ki te ritenga o tāu temepara tapu, me te wehi anō ki a koe. 
E Ihowā, ārahina ahau i runga i tōu tika, he hoariri hoki ōku; whakatikaia tāu ara i mua i ahau. 
Kāhore hoki he pono i ō rātou māngai; he kino kau a roto i a rātou; he urupā puare noa ō rātou korokoro; e patipati ana ō rātou arero. 
Whakataua te hara ki a rātou, e te Atua; kia hinga rātou i ō rātou whakaaro. Peia atu rātou me ā rātou tini mahi tutū; mō rātou i whakakeke ki a koe. 
Nā, kia hari katoa te hunga e whakawhirinaki ana ki a koe. Kia hāmama tonu rātou i te koa, mō rātou e hīpokina nei e koe; ā, kia whakamanamana ki a koe te hunga e aroha ana ki tōu ingoa. 
Nō te mea ka manaakitia e koe, e Ihowā, te tangata tika; me he whakangungu rākau te manako e karapotia ai ia e koe. 
