﻿Waiata.
6.
Ki te tino kaiwhakatangi: Nekinoto, he mea Heminiti. He hīmene nā Rāwiri. E Ihowā, kaua e whakatūpehupehu mai ki ahau, ina riri koe, kaua anō ahau e pākia ina ārita mai koe. 
E Ihowā, tohungia ahau, he ngoikore hoki ahau; rongoātia ahau, e Ihowā, e ohooho ana hoki ōku wheua. 
E ohooho noa iho ana hoki tōku wairua; ko koe ia, e Ihowā, kia pēhea atu te roa? 
Hoki mai, e Ihowā, kia mawhiti atu tōku wairua; kia mahara ki tōu aroha, ā, whakaorangia ahau. 
Kāhore hoki he mahara ki a koe ina mate; ko wai hei whakawhetai ki a koe i roto i te rēinga? 
Māuiui iho ahau i tōku auētanga; e manu ana tōku moenga i ahau ā pau noa te pō; e whakamākūkūria ana e ahau tōku takotoranga ki ōku roimata. 
Pakoko kau tōku kanohi i te tangi; kua koroheke haere i ōku hoariri katoa. 
Mawehe atu i ahau, e ngā kaimahi katoa i te kino; kua rongo nei hoki a Ihowā i te reo o tāku tangi. 
Kua rongo a Ihowā ki tāku īnoi; ka manako a Ihowā ki tāku karakia. 
Ka whakamā, ka pōkaikaha noa iho ōku hoariri katoa; ka hoki rātou, ka pā whakarere atu te whakamā. 
