﻿Waiata.
9.
Ki te tino kaiwhakatangi: Muturapena. He hīmene nā Rāwiri. Ka whakapaua tōku ngākau ki te whakamoemiti ki a Ihowā, ka kōrerotia e ahau āu mahi whakamīharo katoa. 
Ka koa ahau, ka whakamanamana ki a koe, ka hīmene atu ki tōu ingoa, e te Runga Rawa. 
I te hokinga whakamuri o ōku hoariri, tūtuki ana rātou, ngaro iho i tōu aroaro. 
Nāu hoki i whakatika āku kōrero me tōku whakawā; i runga koe i te torōna e noho ana, e whakarite tika ana. 
Kua whakatūpehupehu koe ki ngā tauiwi, hunā ana e koe te tangata kino, horoia atu ana tō rātou ingoa ake ake. 
Ko te hoariri, mutu pū rātou, he ngaromanga oti tonu iho; ā, ko ngā pā i hunā e koe, ngaro whakarere tō rātou whakamaharatanga. 
Ko Ihowā ia noho tonu hei kīngi, ake, ake; kua whakapaia e ia tōna torōna mō te whakawā. 
Ā, e whakarite ia mō te ao i runga i te tika, ka whakatakoto tikanga mō ngā iwi i runga i te pono. 
Hei pā teko anō a Ihowā mō te tangata e tūkinotia ana, hei pā teko i ngā wā o te hē. 
Ā, ka whakawhirinaki ki a koe te hunga e mātau ana ki tōu ingoa; nō te mea e kore e whakarērea e koe, e Ihowā, te hunga e rapu ana i a koe. 
Hīmene ki a Ihowā e noho nei i Hiona. Whakapuakina i waenganui ngā iwi āna mahi. 
Ka whakataki toto ia, ka mahara ia ki a rātou; kāhore e wareware i a ia te karanga a te hunga iti. 
Tohungia ahau, e Ihowā; titiro ki tōku mate i te hunga e kino ana ki ahau, e te kaiwhakaara i ahau i ngā tatau o te mate; 
kia whakakitea katoatia ai e ahau ōu whakamoemiti i ngā tatau o te tamāhine o Hiona; ka hari ahau ki tāu whakaoranga. 
Kua tapoko ngā tauiwi ki te rua i keria e rātou; kua mau tō rātou waewae i roto i te kupenga i hunā e rātou. 
Kua mātauria a Ihowā ki te whakawā e whakaritea ana e ia; he māhanga mō te tangata kino te mahi a ōna ringa. Hikaiono. Hera. 
Ka hoki ngā tāngata kino ki te rēinga, arā ngā iwi katoa e wareware ana ki te Atua. 
E kore hoki e warewarea tonutia te tangata rawakore; e kore e taka tonu tā te hunga iti i tūmanako atu ai. 
E ara, e Ihowā, kei riro i tā te tangata; kia whakawākia ngā tauiwi i tōu aroaro. 
E Ihowā, meinga rātou kia wehi; kia mātau ngā tauiwi he tangata nei anō rātou. Hera 
