﻿Waiata.
11.
Ki te tino kaiwhakatangi. Nā Rāwiri. Ko Ihowā tāku e whakawhirinaki ai; he aha koutou ka mea ai ki tōku wairua, “Rere ā-manu atu ki tō koutou maunga? 
Nanā, kua whakapikoa te kōpere e te hunga kino, e whakatikaia ana ā rātou pere ki te aho, hei perenga pukutanga mā rātou ki te hunga ngākau tika. 
Ki te wāwāhia ngā tūranga ake, me pēhea te tangata tika?” 
Kei tōna temepara tapu a Ihowā, kei te rangi te torōna o Ihowā. E titiro ana ōna kanohi, e whakamātautau ana ōna kamo i ngā tama a te tangata. 
E whakamātautau ana a Ihowā i te tangata tika; ā, e kinongia ana e tōna wairua te tangata kino me te tangata e aroha ana ki te tutū. 
Ka uaina e ia ki runga ki te hunga kino he māhanga, he ahi, he whānāriki, he āwhā tuai kerekere; ko te wāhi tēnā mō tō rātou kapu. 
Nō te mea he tika a Ihowā, e aroha ana ki te tika; ka kite te hunga tika i tōna kanohi. 
