﻿Waiata.
12.
Ki te tino kaiwhakatangi: Heminiti. He hīmene nā Rāwiri. Whakaorangia, e Ihowā; ka mutu hoki ngā tāngata tapu; ka taweke atu te hunga pono i roto i ngā tama a te tangata. 
E kōrero teka ana rātou tētahi ki tētahi; he ngutu patipati, he ngākau rua ō rātou ina kōrero. 
Ka hātepea e Ihowā ngā ngutu patipati katoa, me te arero e kōrero whakapehapeha ana; 
e mea nei, “Mā ō tātou arero tātou ka kake ai; nō tātou anō ō tātou ngutu, ko wai hei ariki mō tātou?” 
“Mō te tūkinotanga i te hunga iti, mō te auē a te hunga rawakore, ka whakatika ahau āianei,” e ai tā Ihowā, “Ka whakanohoia ia e ahau ki te wāhi e ora ai ia i ngā tāngata e whakatūpererū ana ki a ia.” 
He kupu parakore ngā kupu a Ihowā; he hiriwa i whakakorea nei te para i roto i te oumu whenua, he mea tuku whitu. 
Ka tiakina rātou e koe, e Ihowā, ka whakaorangia rātou i tēnei whakatupuranga ake tonu atu. 
E hāereere noa ana ngā tāngata kino i tētahi taha, i tētahi taha, i te mea e whakateiteitia ana te kino i roto i ngā tama a te tangata. 
