﻿Waiata.
14.
Ki te tino kaiwhakatangi. Nā Rāwiri. Kua kī te wairangi i tōna ngākau, “Kāhore he Atua.” Kua pirau rātou, he whakahouhou ā rātou mahi, kāhore tētahi e mahi ana i te pai. 
I titiro iho a Ihowā i te rangi ki ngā tama a te tangata, kia kite me kāhore tētahi e mahara ana, e rapu ana i te Atua. 
Kua peka kē rātou katoa kua pirau tahi; kāhore tētahi e mahi ana i te pai, kāhore kia kotahi. 
E kore rānei e mōhio ngā kaimahi katoa o te kino? E kai nei i tōku iwi, me te mea e kai taro ana, ā, kāhore e karanga ki a Ihowā. 
Nā, i reira rātou e tūiri noa ana; kei roto hoki te Atua i te whakatupuranga o te hunga tika. 
Meinga ana e koutou te whakaaro o te hunga iti hei whakamā, nō te mea ko Ihowā tōna piringa. 
Auē, me i puta mai te whakaoranga o Īharaira i Hiona! Kia whakahokia e Ihowā tāna iwi i te whakarau, ka whakamanamana a Hākopa, ka hari a Īharaira. 
