﻿Waiata.
18.
Ki te tino kaiwhakatangi. He hīmene nā te pononga a Ihowā nā Rāwiri. Nāna i whakahua ngā kupu o tēnei waiata ki a Ihowā i te rā i whakaorangia ai ia i te ringa o ōna hoariri katoa, i te ringa anō o Haora. I mea ia: Ka aroha ahau ki a koe, e Ihowā, e tōku kaha. 
Ko Ihowā tōku kāmaka, tōku pā, tōku kaiwhakaora; tōku Atua, tōku tino kāmaka, e whakawhirinaki ai ahau; tōku whakangungu rākau, te haona o tōku whakaoranga, tōku pourewa tiketike. 
Ka karanga ahau ki a Ihowā, e tika nei kia whakamoemititia; ā, ka ora i ōku hoariri. 
I karapotia ahau e ngā whakawiringa a te mate, ā, whakawehia ana ahau e ngā waipuke o te kino. 
I karapotia ahau e ngā whakawiringa a te rēinga, i haukotia e ngā māhanga a te mate. 
I karanga ahau ki a Ihowā i tōku pāweratanga; i hāmama ki tōku Atua. I whakarongo ia ki tōku reo i roto i tōna temepara, i tae anō tāku hāmama ki tōna aroaro, ki ōna taringa. 
Nā, ka ngāueue te whenua, ka rū, wiri ana ngā pūtake o ngā maunga, ngāueue ana i tōna riri. 
I kake he paowa i ōna pongaponga, ā, kai ana te kāpura a tōna māngai, ngiha ana ngā waro. 
I whakapīngoretia e ia ngā rangi, ā, heke iho ana, ā, i raro te pōuri mātotoru i ōna waewae. 
I eke ia ki runga ki te kerupa, ā, rere ana; āe, i rere omaki ia i runga i ngā parirau o te hau. 
I meinga e ia te pōuri hei wāhi ngaro mōna, hei tēneti i tētahi taha ōna, i tētahi taha; ko te pōuritanga o ngā wai, ko ngā kapua mātotoru o te rangi. 
I rere atu ōna kapua mātotoru i te wherikotanga o tōna aroaro; te whatu, me ngā waro kāpura. 
I papā anō te whatitiri a Ihowā i ngā rangi, ā, puaki ana te reo o te Runga Rawa; he whatu, he waro kāpura. 
I kōkiritia e ia āna pere, ā, marara ana rātou; āe, i kōperea hoki e ia te tini uira, ā, whati ana rātou. 
Kātahi ka kitea ngā takere o ngā wai, ā, ka takoto kau ngā pūtake o te ao i tāu whakatūpehupehutanga, e Ihowā, i te whengunga o te manawa o ōu pongaponga. 
I tono karere mai ia i runga, ka mau ki ahau; tōia ake ahau e ia i roto i ngā wai maha. 
Nāna ahau i ora ai i tōku hoariri kaha, i te hunga e kino ana ki ahau; he kaha rawa hoki rātou i ahau. 
I huakina tatatia ahau e rātou i te rā o tōku matenga; ko Ihowā ia tōku whakawhirinakitanga. 
I whakaputaina ahau e ia ki te wāhi nui, i whakaorangia ahau e ia; he āhuareka nōna ki ahau. 
Rite tonu ki tāku mahi tika tā Ihowā utu ki ahau; rite tonu ki te mā o ōku ringa tāna i whakahoki ai ki ahau. 
Mōku i pupuri i ngā ara o Ihowā, ā, kīhai i hē, i whakarere i tōku Atua. 
Kei mua tonu hoki i ahau āna whakaritenga katoa, kīhai anō i whakamataratia atu i ahau āna tikanga. 
Tapatahi tonu hoki tōku whakaaro ki tōna aroaro, ā, i tiaki ahau i ahau kei kino. 
Nā, ka hōmai e Ihowā he utu ki ahau, rite tonu ki tōku tika, ki te mā o ōku ringa i tōna aroaro. 
He tangata atawhai, ka atawhai hoki koe; he tangata tika, ka tika hoki koe. 
He tangata mā, ka mā hoki koe; he tangata whakakeke, ka whakakeke hoki koe. 
E whakaorangia hoki e koe te iwi ngākau mamae; ka whakahokia anō e koe ki raro ngā kanohi whakakake. 
Māu hoki e whakaū tāku rama; mā Ihowā, mā tōku Atua, e whakamārama tōku pōuri. 
Nāu hoki ahau i rere ai nā waenganui atu i te rōpū; nā tōku Atua hoki i pekea ai e ahau te taiepa. 
Tēnā ko te Atua, tika tonu tōna ara; kua oti tāna kupu te whakamātau; he whakangungu rākau ia ki te hunga katoa e whakawhirinaki ana ki a ia. 
Ko wai oti te Atua, ki te kāhore a Ihowā? Ko wai hoki he kāmaka, ki te kāhore tō tātou Atua? 
Ko te Atua, nāna ahau i whītiki ki te kaha, i mea kia tino tika tōku ara. 
Ko ia hei mea i ōku waewae kia rite ki ō te hāta; māna hoki ahau e whakatū ki runga ki ōku wāhi tiketike. 
Ko ia hei whakaako i ōku ringa ki te whawhai, ā, whati ana te kōpere parāhi i ōku ringa. 
Kua hōmai anō e koe ki ahau te whakangungu rākau o tāu whakaoranga; puritia ana ahau e tōu ringa matau, whakanuia ana e tōu whakaaro māhaki. 
I whakanuia e koe ōku takahanga i raro i ahau; tē paheke ōku waewae. 
Ka arumia e ahau ōku hoariri, mau iho i ahau; e kore ahau e tahuri mai, ā ngaro noa rātou. 
Marū ana rātou i ahau, tē kaha te whakatika; hinga ana ki raro i ōku waewae. 
Nāu hoki ahau i whītiki ki te kaha mō te whawhai; piko ana i a koe ki raro i ahau te hunga e whakatika mai ana ki ahau. 
Kua meinga e koe kia tahuri mai ngā tuarā o ōku hoariri ki ahau, kia hautopea ai e ahau te hunga e kino ana ki ahau. 
I karanga rātou, heoi kāhore he kaiwhakaora; ki a Ihowā, otirā kīhai i whakahoki kupu ki a rātou. 
Nā, ka tukia rātou e ahau ā rite noa rātou ki te puehu e pūhia ana e te hau; ākiritia atu ana rātou ki waho, ānō he paru nō te huarahi. 
Kua whakaorangia ahau e koe i ngā ngangautanga a te iwi; kua meinga e koe hei rangatira mō ngā tauiwi; hei apa mōku te iwi kāhore i mātauria e ahau. 
Kia rongo kau te taringa ki ahau, ka kakama tonu mai rātou ki ahau; ko ngā tāngata iwi kē ngohe kau ki ahau. 
Ka memeha haere ngā tāngata iwi kē; ka puta wehi mai hoki i roto i ō rātou kuhunga. 
E ora ana a Ihowā; kia whakapaingia hoki tōku kāmaka, kia whakanuia te Atua o tōku whakaoranga; 
ko te Atua, māna nei e rapu he utu mōku, māna e pēhi ngā iwi ki raro i ahau. 
Māna ahau e mawhiti ai i ōku hoariri, āe rā, māu ahau e mea kia teitei ake i te hunga e whakatika mai ana ki ahau; ka whakaorangia ahau e koe i te tangata tutū. 
Mō konei ka whakawhetai ahau ki a koe, e Ihowā, i waenganui i ngā tauiwi; ka hīmene ki tōu ingoa. 
He nui nei tāna whakaora i tāna kīngi; e whakaputa aroha ana ki tāna tangata i whakawahi ai, ki a Rāwiri rātou ko ōna uri ake ake. 
