﻿Waiata.
21.
Ki te tino kaiwhakatangi. He hīmene nā Rāwiri. Ka hari te kīngi ki tōu kaha, e Ihowā; anō te nui o tōna whakamanamana ki tāu whakaoranga! 
Kua hōmai e koe ki a ia tā tōna ngākau i hiahia ai; kīhai anō i kaiponuhia e koe tā ōna ngutu i īnoi ai. Hera 
Kei mua nei hoki koe i a ia e hōmai ana i ngā manaakitanga o te pai; karaunatia ana e koe tōna mātenga ki te tino kōura. 
He ora tāna i īnoi ai i a koe, ā, kua hōmai e koe ki a ia, he roa noa atu ngā rā ake ake. 
Te nui tōna korōria i tāu whakaoranga; uhia ana ia e koe ki te hōnore, ki te korōria. 
Nāu hoki ia i mea kia manaakitia rawatia ake ake; whakaharitia ana ia e koe ki te koa o tōu mata. 
E whakawhirinaki ana hoki te kīngi ki a Ihowā; e kore anō ia e whakangāueuetia, he atawhai hoki nō te Runga Rawa. 
Ka mau i tōu ringa ōu hoariri katoa; ka mau i tōu ringa matau te hunga e kino ana ki a koe. 
Ka meinga rātou e koe, kia rite ki te oumu kāpura i te wā e riri ai koe; e horomia rātou e Ihowā ina weriweri ia, ā, mā te kāpura rātou e kai. 
Ka whakamōtītia e koe ō rātou hua i runga i te whenua, ō rātou uri i waenganui o ngā tama a te tangata. 
He kino hoki tā rātou i whakatakoto ai mōu, he mahi nanakia tā rātou i whakaaro ai, kīhai nei i taea e rātou. 
Mō reira ka meinga e koe kia tahuri ō rātou tuarā, ina whakatikaia e koe āu pere i runga i āu aho ki ō rātou mata. 
Kia whakanuia koe, e Ihowā, i runga i tōu kaha! Ka waiata mātou, ka hīmene ki tōu nui. 
