﻿Waiata.
26.
Nā Rāwiri. Whakawākia ahau, e Ihowā, kua haere nei hoki ahau i te tapatahitanga o tōku ngākau; kua whakawhirinaki anō ki a Ihowā, nā, e kore e paheke. 
Tirohia iho ahau, e Ihowā, whakamātauria ahau, kia kitea ōku whatumanawa me tōku ngākau. 
Kei mua hoki tōu atawhai i ōku kanohi; kua haere nei ahau i tōu pono. 
Kāhore ahau i noho tahi ki ngā tāngata horihori; e kore anō ahau e tomo tahi me ngā tāngata tinihanga. 
Kino tonu ahau ki te whakaminenga o ngā kaimahi i te hē, e kore anō ahau e noho tahi ki te hunga kino. 
Ka horoia e ahau ōku ringa ki te harakore, ka taiāwhio ai i tāu āta, e Ihowā; 
ā, ka rangona tōku reo e whakamoemiti ana, e whakapuaki ana i āu mahi whakamīharo katoa. 
E Ihowā, kua aroha nei ahau ki tōu whare nohoanga, ki te wāhi e nohoia ana e tōu korōria. 
Kei huia tōku wairua ki roto ki te hunga hara, me tōku ora ki roto ki te hunga toto. 
He mahi nanakia hoki tā ō rātou ringa; kī tonu ō rātou matau i te utu whakapati. 
Ko ahau ia, ka haere i runga i tōku tapatahi; hokona ahau, tohungia hoki ahau. 
E tū ana tōku waewae i te wāhi tika; ka whakapaingia a Ihowā e ahau i roto i ngā whakaminenga. 
