﻿Waiata.
27.
Nā Rāwiri. Ko Ihowā tōku mārama, tōku whakaoranga; kia wehi ahau i a wai? Ko Ihowā te kaha o tōku ora; ko wai e mataku ai ahau? 
I te whakatatanga mai o te hunga kino, o ōku hoariri, o ōku hoa whāinga, ki te kai i ōku kikokiko, tūtuki ana rātou, hinga ana. 
Ahakoa whakapae noa te ope i ahau e kore tōku ngākau e wehi; ahakoa ara noa te pakanga ki ahau, ka au tonu ia ahau. 
Kotahi tāku mea i īnoi ai i a Ihowā, ko tāku tēnā e rapu ai: kia noho i te whare o Ihowā i ngā rā katoa e ora ai ahau, kia kite ai i te ātaahua o Ihowā, kia ui ai i roto i tōna temepara. 
Ka hunā hoki ahau e ia ki tōna tēneti i te rā o te hē, ka hunā ki te wāhi ngaro i tōna tapenākara, ka hāpainga ahau ki runga ki te kōhatu. 
Nā āianei, ka teitei tōku māhunga ki runga ake i ōku hoariri, e karapoti nei i ahau; ā, ka patua e ahau i roto i tōna tapenākara he whakahere hari; ka waiata ahau, āe ka hīmene ki a Ihowā. 
Whakarongo mai ki tōku reo, e Ihowā, ua karanga ahau, tohungia ahau, whakahokia mai hoki he kupu ki ahau. 
I a koe i mea, “Rapua e koutou tōku mata.” Ka mea tōku ngākau ki a koe, “Ka rapu ahau i tōu mata, e Ihowā.” 
Kaua tōu mata e hunā ki ahau. Kaua tāu pononga e peia atu ua riri koe; ko koe tōku kaiāwhina, kei mahue ahau i a koe, kei whakarērea e koe, e te Atua o tōku whakaoranga. 
Ki te whakarērea ahau e tōku pāpā, e tōku whaea, ko Ihowā hei tukunga atu mōku. 
E Ihowā, whakaakona ahau ki tāu ara; ārahina ahau i te ara tika, he hoariri hoki ōku. 
Kaua ahau e tukua ki te hiahia o ōku hoariri; kua whakatika mai hoki ki ahau he kaiwhakapae teka, me te hunga manawa nanakia. 
Kua ngohe ahau, me i kaua ahau i whakapono, tērā ahau e kite i te pai o te Atua i te whenua o te ora. 
Tāria a Ihowā; kia māia, ā, kia kaha tōu ngākau; inā, tāria a Ihowā. 
