﻿Waiata.
28.
Nā Rāwiri. Ka karanga ahau ki a koe, e Ihowā, e tōku kōhatu, kaua e wahangū ki ahau. Ki te wahangū hoki koe ki ahau, ka rite ahau ki te hunga e heke atu ana ki te poka. 
Whakarongo ki tōku reo īnoi, ua karanga ahau ki a koe, ina totoro ōku ringa ki tōu ahurewa tapu. 
Kaua ahau e kūmea tahitia me te hunga hē; me ngā kaimahi i te kino, he mārie ā rātou kupu ki ō rātou hoa, he kino ia kei roto i ō rātou ngākau. 
Kia rite ki ā rātou mahi tāu e hoatu ai ki a rātou, ki te kino anō o ā rātou hanga; kia rite ki ngā mahi a ō rātou ringa tāu e hoatu ai ki a rātou, whakahokia tā rātou utu ki a rātou. 
Nā, kāhore nei rātou e whakaaro ki ngā mahi a Ihowā, ki ngā meatanga a ōna ringa, mō reira ka whakahoroa iho rātou e ia, e kore anō e whakatūria ake. 
Kia whakapaingia a Ihowā mōna i whakarongo mai ki tōku reo īnoi. 
Ko Ihowā tōku kaha, tōku whakangungu rākau; i whakawhirinaki tōku ngākau ki a ia, ā, āwhinatia ana ahau; koia i hari ai tōku ngākau, i whakamoemiti ai hoki tāku waiata ki a ia. 
Ko Ihowā tō rātou kaha, ko ia anō te kaha whakaora o tāna tangata i whakawahi ai. 
Whakaorangia tāu iwi, manaakitia tōu kāinga tupu; whāngainga rātou, whakaarahia ake ake. 
