﻿Waiata.
29.
He hīmene nā Rāwiri. Hoatu ki a Ihowā, e ngā tama a te hunga nunui, hoatu ki a Ihowā te korōria me te kaha. 
Hoatu ki a Ihowā te korōria e rite ana mō tōna ingoa, koropiko ki a Ihowā i roto i te ātaahua o te tapu. 
Kei runga te reo o Ihowā i ngā wai; e papā ana te whatitiri a te Atua o te korōria; kei runga a Ihowā i ngā wai maha. 
Kaha tonu te reo o Ihowā; korōria tonu te reo o Ihowā. 
Mongamonga noa ngā hīta i te reo o Ihowā; inā, mongamonga noa i a Ihowā ngā hīta o Repanōna. 
Ko ia hei mea i a rātou kia mokowhiti, ānō he kūao; a Repanōna rāua ko Hiriona, ānō he kūao kau mākā. 
E wehewehe ana te reo o Ihowā i ngā mura ahi. 
Wiri ana te koraha i te reo o Ihowā; wiri ana i a Ihowā te koraha o Karehe. 
Whānau ana ngā hāta i te reo o Ihowā, tīhorea ana ngā ngahere kia tahanga; i tōna temepara ko te kupu a te katoa, “Korōria!” 
I noho a Ihowā hei kīngi i runga i te waipuke; āe, ka noho a Ihowā hei kīngi, ake ake. 
Ka hōmai e Ihowā he kaha ki tāna hunga; he rongo mau tā Ihowā manaaki mō tāna hunga. 
