﻿Waiata.
30.
He hīmene. He waiata mō te tāinga o te kawa o te whare. Nā Rāwiri. Ka whakanui ahau i a koe, e Ihowā; nāu hoki ahau i hāpai ake, ā, kīhai i tukua ōku hoariri kia hari ki ahau. 
E Ihowā, e tōku Atua, i karanga ahau ki a koe, ā, kore ake tōku mate i a koe. 
E Ihowā, nāu i whakaputa ake tōku wairua i te rēinga; nāu ahau i whakaora kei heke ki te poka. 
Hīmene ki a Ihowā, e tāna hunga tapu, whakawhetai hoki ki tōna ingoa tapu. 
He iti hoki te wāhi e riri ai ia; he oranga ki te manakohia e ia. E tau iho te tangi i te ahiahi, ā, i te ata he hari. 
I mea ahau i tōku wā i kake ai, “E kore ahau e whakangāueuetia ā muri ake nei.” 
He manakohanga nāu, e Ihowā, i ū ai i a koe te tū o tōku maunga; i hunā e koe tōu mata, ā, raru iho ahau. 
E Ihowā, i karanga ahau ki a koe, i īnoi hoki ki a Ihowā. 
“He aha te pai o ōku toto ina heke ahau ki te poka? Mā te puehu koia koe e whakamoemiti? Māna oti e whakapuaki tōu pono? 
Whakarongo, e Ihowā, tohungia hoki ahau; e Ihowā, ko koe hei āwhina mōku.” 
Kua puta kē i a koe tāku tangi hei kanikani; kua wewete i tōku kākahu taratara, ā, whītikiria ana ahau e koe ki te koa; 
hei mea e hīmene ai tōku korōria ki a koe, kore ake e wahangū. E Ihowā, e tōku Atua, ka whakawhetai ahau ki a koe ake ake. 
