﻿Waiata.
33.
Kia hari ki a Ihowā, e te hunga tika; he mea ātaahua te whakamoemiti mā te hunga kore hē. 
Whakamoemiti ki a Ihowā i runga i te hāpa; hīmene ki a ia i runga i te hātere kotahi tekau nei ngā aho. 
Waiatatia ki a ia he waiata hou; kia tika te whakatangi, kia nui te reo. 
Nō te mea he tika te kupu a Ihowā, ā, kei runga i te pono āna mahi katoa. 
E paingia ana e ia te tika me te whakawā; kī tonu te whenua i te atawhai a Ihowā. 
Nā te kupu a Ihowā ngā rangi i hanga; ko ngā mano katoa hoki o reira nā te hā o tōna māngai. 
He mea huihui e ia ngā wai o te moana, ānō he pūranga; he mea whawhao e ia te rire ki ngā pākoro. 
Kia wehi te whenua katoa ki a Ihowā; kia ohooho ngā tāngata katoa o te ao ki a ia. 
I kī hoki ia, ā, kua oti; i whakahau, ā, tū tonu iho. 
E whakatakā ana e Ihowā te whakaaro o ngā tauiwi; e whakakāhoretia ana e ia ngā meatanga a ngā iwi. 
Ko te whakaaro o Ihowā, tū tonu ake ake; ko ngā meatanga a tōna ngākau kei tēnā whakatupuranga, kei tēnā whakatupuranga. 
Ka hari te iwi nō rātou nei Atua a Ihowā, te iwi kua whiriwhiria e ia hei taonga tupu mōna. 
E titiro iho ana a Ihowā i te rangi; e kite ana ia i ngā tama katoa a te tangata. 
Kei tōna wāhi nohoanga ia e mātakitaki iho ana ki ngā tāngata katoa o te whenua. 
Nāna i hanga ngā ngākau o rātou katoa, e mōhiotia ana e ia ā rātou mahi katoa. 
E kore tētahi kīngi e ora i te nui o te ope, e kore e ora te mārohirohi i te nui o te kaha. 
He mea teka te hōiho hei whakaora; ehara anō tōna kaha nui i te mea e mawhiti ai. 
Nanā, kei runga i te hunga e wehi ana i a ia te kanohi o Ihowā, kei te hunga e tūmanako ana ki tāna mahi tohu; 
hei whakaora i ō rātou wairua kei mate, hei mea i a rātou kia ora i te wā o te hemokai. 
Kua tatari nei ō tātou wairua ki a Ihowā; ko ia tō tātou kaiāwhina, tō tātou whakangungu rākau. 
Hari tonu tō tātou ngākau ki a ia; nō tātou hoki i whakawhirinaki ki tōna ingoa tapu. 
E Ihowā, hei runga i a mātou tāu mahi tohu; kia rite hoki ki tā mātou tūmanako ki a koe. 
