﻿Waiata.
36.
Ki te tino kaiwhakatangi. Nā te pononga a Ihowā, nā Rāwiri. E mea ana te mahi kino a te tangata hara i roto i tōku ngākau, kāhore he wehi ki te Atua i mua i ōna kanohi. 
E whakapai ana hoki ōna kanohi ake ki a ia anō, e kore e kitea tōna hara, e kore e kinongia. 
He kino ngā kupu a tōna māngai, he rauhanga hoki, kua mahue i a ia te mahara, te mahi i te pai. 
He mahi nanakia tāna e whakaaro ai i runga i tōna moenga; ehara i te pai te ara e tūria ana e ia, kāhore ōna whakarihariha ki te kino. 
Kei ngā rangi, e Ihowā, tāu mahi tohu; tutuki noa atu tōu pono ki ngā kapua. 
Rite tonu tōu tika ki ngā maunga o te Atua; he rire nui āu whakaritenga; ko koe, e Ihowā, te kaiwhakaora i te tangata, i te kararehe. 
Anō te pai o tōu aroha, e te Atua; ka okioki ngā tama a te tangata i raro i te taumarumarutanga iho o ōu pākau. 
Ka mākona rātou i ngā mea mōmona o tōu whare; ka whakainumia anō e koe ki te awa o āu mea whakahari. 
Kei a koe hoki te puna o te ora; mā tōu mārama ka kite ai mātou i te mārama. 
Kia roa tōu aroha ki te hunga e mātau ana ki a koe, tōu tika hoki ki te hunga ngākau tika. 
Kei puta mai ki ahau te waewae whakapakari; kei āia atu ahau e te ringa o te hunga hara. 
Hinga iho i reira ngā kaimahi i te kino; kua turakina iho, tē āhei te ara ake. 
