﻿Waiata.
45.
Ki te tino kaiwhakatangi. He Hohanimi mā ngā tama a Koraha. He Makiri, he waiata aroha. E pupuke ake ana te mea pai i roto i tōku ngākau; ka kōrerotia e ahau āku i tito ai mō te kīngi; he pene tōku arero nā te kaituhituhi hohoro. 
Engari koe he ātaahua i ngā tama a te tangata; kua ringihia ōu ngutu ki te āhuareka; nā reira i manaakitia ai koe e te Atua ake ake. 
Whītikiria tāu hoari ki tōu hūwhā, e te Nui Rawa, tōu korōria me tōu hōnore. 
Aratakina hoki tōu hōiho i runga i tōu hōnore, i te kaha, hei mea hoki mō te pono, mō te māhaki, mō te tika, ā, mā tōu matau koe e whakaako ki ngā mea whakamataku. 
He koi āu pere; ka hinga ngā iwi ki raro i a koe; kei roto rātou i te ngākau o ngā hoariri o te kīngi. 
He pūmau, e te Atua, tōu torōna ake ake; he hēpeta tika te hēpeta o tōu kīngitanga. 
Kua aroha koe ki te tika, kua kino ki te hara; nā reira, nui atu i tō ōu hoa te whakawahinga a te Atua, a tōu Atua i a koe ki te hinu o te hari. 
Ko tōu kākahu katoa he kakara maira, he aroe, he kahia. Ko ngā mea aho, whakatangitangi o ngā whare rei nāna koe i whakaahuareka. 
Kei roto i āu wāhine hōnore ngā tamāhine kīngi; kei tōu matau te kuīni e tū ana, nō Ōpira te kōura. 
Whakarongo, e kō, titiro, tahuri iho tōu taringa; ā, kia wareware koe ki tōu iwi, ki te whare anō o tōu pāpā. 
Pēnei ka matenuitia e te kīngi tōu ātaahua; ko ia hoki tōu Ariki; ā, me koropiko ki a ia. 
Ko reira anō te tamāhine o Tāira me te ohaoha; ka whai anō ngā tāngata taonga o te iwi kia manakohia e koe. 
Kei roto te tamāhine a te kīngi, he korōria kau, he mea whakairo ki te kōura tōna kākahu. 
He mea whakapaipai ki te ngira tōna kākahu e kawea ai ia ki te kīngi; ka ārahina ki a koe ngā wāhina, ōna takahoa e whai ana i a ia. 
He hari, he koa ina kawea mai rātou; ka tomo ki te whare o te kīngi. 
Ko āu tamariki hei whakakapi mō ōu mātua; ka meinga anō rātou e koe hei kāwana mō te whenua katoa. 
Ka meinga e ahau tōu ingoa kia maharatia e ngā whakatupuranga katoa; e whakamoemititia ai koe e ngā iwi ā ake ake. 
