﻿Waiata.
46.
Ki te tino kaiwhakatangi, mā ngā tama a Koraha. He waiata Arāmoto. Ko te Atua tō tātou piringa, tō tātou kaha; he kaiāwhina e tino tata ana i ngā wā o te hē. 
Nā reira kore ake tō tātou wehi, ahakoa nekehia te whenua, ahakoa kāhakina ngā maunga ki waenga moana; 
ahakoa rarā, taupatupatu noa ōna wai, ahakoa wiri ngā maunga i tōna huamo. Hera 
He awa tēnā ko ōna manga hei whakahari i te pā o te Atua, i te wāhi tapu o ngā tapenākara o te Runga Rawa. 
Kei waenganui ōna te Atua, e kore ia e whakakorikoria; mā te Atua ia e āwhina i te putanga anō o te ata. 
I nanā ngā tauiwi, i whakakorikoria ngā rangatiratanga; puaki ana tōna reo, rewa ana te whenua. 
Kei a tātou a Ihowā o ngā mano, ko te Atua o Hākopa tō tātou piringa. Hera 
Haere mai, tirohia ngā mahi a Ihowā, ngā whakangaromanga i whakaputaina e ia ki te whenua. 
E whakamutua ana e ia ngā whāinga ā te pito rā anō o te whenua; whati ana i a ia te kōpere, poro pū te tao, tahuna ake e ia te hāriata ki te kāpura. 
“Kia āta noho, ā, kia mātau ko ahau te Atua; e whakanuia ahau i waenganui i ngā tauiwi, e whakanuia ahau i te whenua.” 
Kei a tātou a Ihowā o ngā mano; ko te Atua o Hākopa tō tātou piringa. Hera 
