﻿Waiata.
48.
He waiata, he hīmene mā ngā tama a Koraha. He nui a Ihowā, kia nui hoki te whakamoemiti ki a ia i te pā o tō tātou Atua, i te maunga o tōna tapu; 
ātaahua ana te tairanga o Maunga Hiona, ko tā te ao katoa e koa ai; kei te taha ki te raki te pā o te Kīngi nui. 
E mātauria ana te Atua i roto i ōna whare papai hei piringa. 
Nā, huihui tahi mai ana ngā kīngi, haere tahi atu ana rātou. 
I kite rātou, mīharo iho; raruraru ana, hohoro tonu atu. 
Pā ana te wehi ki a rātou i reira, te mamae, ānō he wahine e whānau ana. 
E wāhia ana e koe ngā kaipuke o Tarahihi ki te marangai. 
Rite tonu ki tā mātou i rongo ai, tā mātou i kite ai i roto i te pā o Ihowā o ngā mano, i te pā o tō tātou Atua; mā te Atua e whakapūmau ake ake. Hera 
I whakaaroaro mātou ki tōu atawhai, e te Atua, i waenganui o tōu temepara. 
E te Atua, rite tahi ki tōu ingoa te whakamoemiti mōu, tae noa atu ki ngā pito o te whenua; kī tonu tōu matau i te tika. 
Kia hari a Maunga Hiona, kia koa ngā tamāhine a Hūrā i āu whakaritenga. 
Taiāwhiotia a Hiona, haere, ā kōpiko noa mai; taua ōna pourewa, 
maharatia ōna pekerangi, tirohia ōna whare papai; hei kōrerotanga mā koutou ki ēnei ake whakatupuranga. 
Ko tēnei Atua hoki te Atua mō tātou ake ake. Ko ia hei kaiārahi i a tātou ā mate noa. 
