﻿Waiata.
49.
Ki te tino kaiwhakatangi. He hīmene mā ngā tama a Koraha. Whakarongo ki tēnei, e ngā iwi katoa; tahuri mai ō koutou taringa, e ngā tāngata katoa o te ao. 
E ngā tāngata iti, koutou ko ngā tāngata rahi, e te tangata taonga kōrua ko te rawakore. 
Ka whakapuakina he mātauranga e tōku māngai; ā, he āta ngārahu te whakaaro o tōku ngākau. 
Ka tītaha tōku taringa ki te kupu whakarite; ka puaki tāku pepeha i runga i te hāpa. 
Kia wehi ahau ki te aha i ngā rā o te kino, ina karapotia ahau e te kino kei ōku rekereke? 
Ko te hunga e whakawhirinaki ana ki ō rātou taonga, e whakamanamana ana ki te nui o ō rātou rawa. 
E kore tētahi o rātou e āhei te hoko i tōna teina, te hoatu rānei i tētahi utu mōna ki te Atua. 
He nui hoki te utu mō tō rātou wairua, ā, me whakarere atu ake ake; 
kia ora tonu ai ia ake ake, kia kaua e kite i te pirau. 
E kite ana hoki ia e matemate ana ngā tāngata whakaaro nui, e ngaro ngātahi ana te pōauau me te whakaarokore, ā, mahue iho ō rātou taonga ki ētahi atu. 
Ki tō rātou whakaaro puku, tērā e pūmau tonu ō rātou whare me ō rātou nohoanga, ki ngā whakatupuranga katoa; huaina iho ō rātou whenua ki ō rātou ingoa. 
Heoi, kāhore te tangata e noho tonu i roto i te hōnore; ko tōna rite kei ngā kararehe ka mōtī nei. 
Ko tō rātou ara tēnei, arā ko tō rātou pōauau; heoi e whakapai ana tō rātou uri ki ā rātou kōrero. Hera 
Kei te hipi te rite; ko te wāhi mō rātou ko te rēinga; ko te mate hei hēpara mō rātou, hei rangatira anō te hunga tika mō rātou i te ata; ko tō rātou ātaahua mā te rēinga e whakamōtī, kia kore ai he whare mōna. 
Mā te Atua ia tōku wairua e hoko mai i te rēinga; ko ia hoki hei tukunga atu mōku. Hera 
Kaua e wehi ua whai taonga te tangata, ina nui haere te korōria o tōna whare. 
Kāhore hoki āna mea e mau atu ai ia ina mate; e kore tōna korōria e tuku iho i muri i a ia. 
Whakapai noa ia i tōna wairua i a ia e ora ana; ā, ka whakamoemititia koe ua pai āu mahi ki a koe anō. 
Ka haere ia ki te whakatupuranga o ōna tūpuna; e kore rawa rātou e kite i te mārama. 
Ko te tangata e whakahōnoretia ana, ā, kāhore e whai whakaaro, kei ngā kararehe ka mōtī nei tōna rite. 
