﻿Waiata.
55.
Ki te tino kaiwhakatangi Nekinoto. He Makiri nā Rāwiri. E te Atua, tahuri mai tōu taringa ki tāku īnoi; kei whakangaro atu koe, ina tangi ahau. 
Anga mai ki ahau, whakahokia mai he kupu ki ahau; pōkaikaha noa iho ahau i ahau e tangi nei, e hāmama nei; 
i te reo hoki o te hoariri, i te tūkino a te tangata kino. Nō te mea e utaina ana e rātou he hara ki runga ki ahau, ā, e kino ana ki ahau, e riri ana. 
Mamae pū tōku ngākau i roto i ahau; kua taka ki runga ki ahau ngā wehi whakamate. 
Kua pā ki ahau te wehi me te wiri; ā, pōkia iho ahau e te whakamataku. 
Nā, ko tāku meatanga, “Auē, te whai pākau ahau me he kūkupa; pēnei ka rere atu ahau, ā, ka whai okiokinga. 
Kātahi ahau ka rere ki tawhiti; ā, noho rawa atu i te koraha. Hera 
Ka hohoro tōku rere atu i te hau, i te āwhā.” 
Whakangaromia, e te Ariki, wehea ō rātou arero; kua kitea hoki e ahau te tūkino me te tutū o roto o te pā. 
Hāereere ana rātou i te ao, i te pō, i runga i ōna taiepa, ā tawhio noa; he kino kei roto, he hīanga. 
He hara kei waenganui ōna; kāhore ōna ara e mahue i te tinihanga, i te hīanga. 
Ehara hoki i te hoariri nāna ahau i tāwai; pēnei e taea e ahau te whakaririka; ehara hoki i te hoa whawhai nōku i whakakake ki ahau; pēnei kua piri ahau, kei kitea e ia. 
Nāu ia, nā te tangata i rite ki ahau, nā tōku takahoa, nā tāku i mōhio ai. 
Āhuareka tonu tā tāua kōrerorero; haere tahi ana hoki tāua i roto i te rōpū ki te whare o te Atua. 
Kia mau ohorere rātou i te mate, kia heke ora ki te rēinga; he hara hoki kei ō rātou nohoanga, kei waenganui i a rātou. 
Ko ahau, ka karanga ahau ki te Atua; ā, mā Ihowā ahau e whakaora. 
I te ahiahi, i te ata, i te poutūmārōtanga, ka īnoi ahau, ka tangi; ā, ka whakarongo ia ki tōku reo. 
Whakaorangia ana e ia tōku wairua i runga i te rangimārie i ahau e whakaekea ana; he tokomaha hoki ōku hoa whawhai. 
Ka whakarongo te Atua, nō tua iho nei tōna nohoanga, ā, ka whakahoki i tā rātou. Hera Ko te hunga kāhore ō rātou whakawhitiwhitinga, ā, kāhore ō rātou wehi ki te Atua. 
Kua totoro ōna ringa ki te hunga kua mau nei tā rātou rongo ki a ia; kua whakatakā e ia tāna kawenata. 
Māeneene atu tōna māngai i te pata, he whawhai ia kei roto i tōna ngākau; ngāwari atu āna kupu i te hinu, kāhore, he hoari kua oti te unu. 
Makā ki runga ki a Ihowā tāu pīkaunga, ā, māna koe e whakaū ake; e kore e tukua e ia te hunga tika kia whakangāueuetia ake ake. 
Māu ia rātou e mea, e te Atua, kia heke ki te poka o te pirau; e kore ngā tāngata toto, ngā tāngata hīanga e tutuki ki te hāwhe o ō rātou rā. Ko ahau ia, ka whakawhirinaki ki a koe. 
