﻿Waiata.
56.
Ki te tino kaiwhakatangi: Ionata Ēreme Rehokime. Nā Rāwiri. He Mikitama, i a ia ka mau i ngā Pirihitini ki Kāta. Tohungia ahau e te Atua, ka horomia hoki ahau e te tangata; e tūkino ana ia ki ahau i te rā roa nei, i a ia e ngangare tonu nei. 
E whai ana ōku hoariri i te rā roa nei, kia horomia ahau; he tokomaha nei hoki e whakahī ana, e whawhai mai ana ki ahau. 
Ka whakawhirinaki ahau ki a koe i te wā e mataku ai ahau. 
Mā te Atua ahau ka whakamoemiti ki tāna kupu; e whakawhirinaki ana ahau ki te Atua, e kore ahau e wehi. He aha tā te kikokiko e mea ai ki ahau? 
E whakariroia kētia ana e rātou āku kupu i ngā rā katoa; heoi anō tā rātou e whakaaro ai ko te kino mōku. 
E huihui ana rātou, e piri ana; e titiro matatau ana ki ōku hīkoinga, i a rātou e whanga nei ki tōku wairua. 
Mā te hē koia rātou ka mawhiti ai? Kia riri koe, e te Atua, whakatakā iho hoki ngā iwi. 
E taua ana e koe ōku kōpikopikotanga; rongoātia ōku roimata ki roto ki tāu ipu; kāhore ianei i tāu pukapuka? 
I te rā e karanga ai ahau ka hoki whakamuri ōku hoariri; e mātau ana ahau ki tēnei, kei ahau hoki te Atua. 
Mā te Atua ahau ka whakamoemiti ai ki tāna kupu; mā Ihowā ahau ka whakamoemiti ai ki tāna kupu. 
E whakawhirinaki ana ahau ki te Atua; e kore ahau e wehi. He aha tā te tangata e mea ai ki ahau? 
Kei ahau ngā kupu taurangi ki a koe, e te Atua; me tuku e ahau ngā whakamoemiti ki a koe. 
Nāu hoki tōku wairua i whakaora kei mate; e kore ianei koe e whakaū i ōku waewae kei paheke, kia haere ai ahau i te aroaro o te Atua i roto i te mārama o te hunga ora. 
