﻿Waiata.
58.
Ki te tino kaiwhakatangi: Aratakiti. He Mikitama. Nā Rāwiri. He kōrero puku rānei tā koutou i te pono? He tika rānei tā koutou whakarite, e ngā tama a te tangata? 
He pono, e mahia ana e koutou te hē i roto i te ngākau, e pāunatia ana e koutou te tutū a ō koutou ringa i runga i te whenua. 
He tangata kē te hunga hara nō te kōpū mai anō; whānau kau kua kotiti kē, kua kōrero teka. 
Ko tō rātou paihana he rite ki tō te nākahi, kei te neke turi e puru nei i tōna taringa; 
e kore nei e whakarongo ki te reo o te kaiwhakawai, ahakoa tino mātau ia ki te whakawai. 
Whatia, e te Atua, ō rātou niho i roto i ō rātou māngai; kōwhakia, e Ihowā, ngā niho nunui o ngā kūao raiona. 
Kia mimiti rātou, ānō he wai e heke atu ana; ka whakatikaia āna pere, kia rite ki te mea kua pōutoa. 
Kia memeha haere, ā, kia pahure, ānō he ngata; kia rite ki te mea mate roto a te wahine, kāhore nei i kite i te rā. 
E kore e tukua kia rongo ā koutou kōhua i ngā tātarāmoa, ka kāhakina rātou e ia i roto i te āwhiowhio, te mea kaiota, te mea e wera ana. 
Ka hari te tangata tika ua kite i te utu; ka horoia e ia ōna waewae ki ngā toto o te tangata hara. 
Ā, ka mea te tangata, “Koia, ka whai utu te tangata tika; inā, he Atua anō tēnei e whakawā ana i te whenua.” 
