﻿Waiata.
59.
Ki te tino kaiwhakatangi: Aratakiti. He Mikitama nā Rāwiri, i a Haora i tono tāngata hei tiaki mō te whare, hei whakamate mōna. Whakaorangia ahau, e tōku Atua, i ōku hoariri; whakateiteitia ake ahau i te hunga e whakatika ana ki ahau. 
Whakaorangia ahau i ngā kaimahi i te kino; kia ora ahau i te hunga toto. 
Kei te whanga nei hoki rātou mō tōku wairua; e whakamine ana te hunga kaha ki te whawhai ki ahau; kāhore nei ōku tutū, kāhore ōku hara, e Ihowā. 
Hore ōku kino, oma ana rātou, kei te takatū; e ara hei āwhina mōku, titiro mai hoki. 
Āe rā, maranga, e Ihowā, e te Atua o ngā mano, e te Atua o Īharaira, tirohia iho ngā tauiwi katoa: kaua e tohungia tētahi o te hunga kino, e poka kē nei. Hera 
Ka hoki mai rātou i te ahiahi, kei te tau, ānō he kurī, taiāwhiotia ana e rātou te pā. 
Nanā, kei te kūpā ō rātou māngai, he hoari kei ō rātou ngutu; ki tā rātou, “Ko wai e rongo?” 
Ko tāu ia, e Ihowā, he kata ki a rātou; hei tāwainga māu ngā tauiwi katoa. 
E tōku kaha, ka tatari ahau ki a koe; ko te Atua hoki tōku pā. 
Kei mua i ahau tōku Atua aroha; mā te Atua ahau ka kite i tāku i hiahia ai ki ōku hoariri. 
Kaua rātou e whakamatea, kei wareware tōku iwi; kia whakamararatia rātou e tōu kaha; whakatakā iho rātou, e te Ariki, e tō mātou whakangungu rākau. 
Mō te hara o tō rātou māngai, mō ngā kupu a ō rātou ngutu, hopukia rātou i runga i tō rātou whakakake, mō tā rātou kōrero, he kanga, he teka. 
Whakamōtītia i runga i te riri, kia kāhore ai rātou; ā, kia mātau rātou ko te Atua te Kāwana o Hākopa puta noa ki ngā pito o te whenua. Hera 
I te ahiahi tukua rātou kia hoki, tukua rātou kia tau, ānō he kurī, kia taiāwhio rātou i te pā. 
Ka kōpikopiko noa rātou ki te rapu kai, ā, ka tauwhanga i te pō roa ina kore rātou e mākona. 
Ko ahau ia, ka waiatatia e ahau tōu kaha; āe, i te ata ka hāmamatia e ahau tāu mahi tohu. Ko koe hoki tōku pā, tōku piringa i te rā o tōku pōuri. 
Ka hīmene ahau ki a koe, e tōku kaha; ko te Atua nei hoki tōku pā, tōku Atua aroha. 
