﻿Waiata.
60.
Ki te tino kaiwhakatangi: Huhana Erutu. He Mikitama nā Rāwiri, hei whakaako. Nō tāna whawhaitanga ki a Aramanaharaima rāua ko Aramatopa. Nā, hoki ana a Ioapa, ā, patua ana e ia a Ēroma ki te Raorao Tote, kotahi tekau mā rua mano. E te Atua, kua panga mātou e koe, kua oti mātou te whakamarara e koe, kua riri koe; tahuri mai anō ki a mātou! 
Wiri ana te whenua i a koe, kua ngātata i a koe; whakakapia ōna wāhi pakaru, e rū ana hoki. 
He mea pakeke kua whakakitea e koe ki tāu iwi, kua oti mātou te whakainu e koe ki te wāina e wiri ai. 
Kua hōmai e koe he kara ki te hunga e wehi ana i a koe; kia whakakitea hei mea mō te pono. Hera 
Hei mea e mawhiti ai āu e aroha ai; mā tōu matau e whakaora, whakahokia mai hoki he kupu ki ahau. 
Kua kōrero te Atua i runga i tōna tapu; “Ka hari ahau, ka kotikoti i Hekeme, ka roherohe hoki i te raorao o Hukota. 
Nōku Kireara, nōku anō a Mānahi, ko Ēparaima anō hoki te kaha o tōku mātenga; ko Hūrā tāku kaiwhakatakoto ture; 
ko Moapa tāku oko horoi; ka makā e ahau tōku hū ki runga ki Ēroma; e Pirihitia, ko ahau hei whakamanamana māu.” 
Mā wai ahau e kawe ki te pā kaha? Nā wai ahau i ārahi ki Ēroma? 
He teka rānei, e te Atua, kua pangā mātou e koe? Kāhore hoki koe, e te Atua, e haere tahi me ā mātou taua. 
Hōmai he āwhina mō mātou ki ō mātou hoariri; he teka noa hoki te āwhina a te tangata. 
Mā te Atua tātou ka toa ai; māna hoki e takahi ki raro ō tātou hoa whawhai. 
