﻿Waiata.
62.
Ki te tino kaiwhakatangi: ki a Ierutunu. He hīmene nā Rāwiri. Ko te Atua anake tāku e tatari nei; kei a ia te whakaoranga mōku. 
Ko ia anake tōku kōhatu, tōku whakaoranga, tōku pā hoki, e kore e nui tōku ngāueuetanga. 
Kia pēhea te roa o tā koutou tatau ki te tangata, kia whakamatea ai e koutou, e koutou katoa, ka rite ki te taiepa e tūngou ana, ki te wāwā ka tata te hinga? 
Heoi anō tā rātou e rūnanga ai ko te turaki i a ia i tōna wāhi teitei; E āhuareka ana ki te teka; e manaaki ana ō rātou māngai, ā, e kanga ana a roto i a rātou. Hera 
Tatari, e tōku wairua, ki te Atua anake; ko ia tāku e tūmanako nei. 
Ko ia anake tōku kōhatu, tōku whakaoranga, tōku pā hoki; e kore ahau e whakangāueuetia. 
Kei te Atua te whakaoranga mōku, te korōria anō mōku; kei te Atua te kōhatu o tōku kaha, tōku piringa. 
Whakawhirinaki ki a ia i ngā wā katoa, e te iwi, ringihia tō koutou ngākau ki tōna aroaro; hei piringa mō tātou te Atua. Hera 
He pono he mea memeha noa ngā ware, he teka noa ngā rangatira; ki te pāunatia rātou, māmā noa ake rātou tahi i te horihori. 
Kaua e whakawhirinaki ki te tūkino, kei wairangi hoki ki te pāhua; ki te tini haere ngā taonga, kei whakamanawa tō koutou ngākau ki reira. 
Kotahi kōrerotanga a te Atua, ka rua ōku rongonga i tēnei: nō te Atua te kaha, 
nāu anō, e te Ariki, te mahi tohu; rite tonu hoki ki tāna mahi tāu utu ki te tangata. 
