﻿Waiata.
63.
He hīmene nā Rāwiri, i a ia i te koraha o Hūrā. E te Atua, nōku koe Atua; ka moata tāku rapu i a koe. E hiainu ana tōku wairua ki a koe, e hiahia ana ōku kikokiko ki a koe, i te whenua maroke, ruha noa, kāhore nei he wai. 
Koia i titiro atu ai ahau ki a koe i te wāhi tapu, kia kite ai i tōu kaha, i tōu korōria. 
Pai atu tōu aroha i te ora; mō reira ka whakamoemiti ōku ngutu ki a koe. 
Inā, ka whakapai ahau ki a koe i ahau anō e ora nei; ka totoro atu ōku ringa i runga i tōu ingoa. 
Ka mākona tōku wairua, ānō i te hinu wheua, i te ngako, ā, ka hari ōku ngutu ina whakamoemiti tōku māngai ki a koe. 
Ina mahara ahau ki a koe i runga i tōku moenga, ina whakaaro ki a koe i ngā mataaratanga o te pō. 
Ko koe hoki tōku kaiāwhina; nā, ka hari ahau ki te taumarumarutanga iho o ōu pākau. 
Piri tonu tōku wairua ki a koe e tautoko ake ana tōu matau i ahau. 
Ko te hunga e whai ana i tōku wairua kia whakangaromia, ka riro rātou ki ngā wāhi o raro rawa o te whenua. 
Ka tukua atu rātou ki te kaha o te hoari; hei wāhi rātou mā ngā pokiha. 
Tēnā ko te kīngi, ka hari ia ki te Atua; ka whakamanamana ngā tāngata katoa ko ia nei tā rātou oati; ā, ka purua te māngai o te hunga katoa e kōrero teka ana. 
