﻿Waiata.
64.
Ki te tino kaiwhakatangi. He hīmene nā Rāwiri. Whakarongo ki tōku reo, e te Atua, ina īnoi atu ahau; tiakina tōku ora i te wehi o te hoariri. 
Hunā ahau i te whakaaro ngaro o te hunga kino, i te ngangau a ngā kaimahi i te hē. 
Kua whakakoi nei i ō rātou arero, ānō he hoari, kua whakatika nei i ā rātou pere, arā i ngā kupu kikino. 
Hei kōperenga pukutanga mā rātou ki te tangata tika; kitea rawatia ake kua kōpere ki a ia, kāhore hoki he wehi. 
E whakamāia ana rātou i a rātou anō ki te mea kino; e rūnanga ana kia whakatakotoria pukutia he rore, e mea ana, “Ko wai e kite i a rātou?” 
E rapu hara ana rātou; e mea ana, “Kua āta rapu mārie tātou.” Taea noatia te hōhonutanga o te whakaaro o ia tangata, ā, ko te ngākau he hōhonu. 
Mā te Atua ia e kōpere he pere ki a rātou kitea rawatia ake kua tū rātou. 
Heoi, ka meinga rātou kia tapatu, ko tō rātou arero ake anō ka tū atu ki a rātou; ā, ka rūrū i tō rātou mātenga te hunga katoa e kite i a rātou. 
Ka wehi anō hoki ngā tāngata katoa, ka whakapuaki i te mahi a te Atua; ka āta maharatia hoki e rātou tāna mahi. 
Ka koa te tangata tika ki a Ihowā, ka whakawhirinaki hoki ki a ia; ka whakamanamana anō te hunga ngākau tika katoa. 
