﻿Waiata.
69.
Ki te tino kaiwhakatangi. Hohanimi. Nā Rāwiri. Whakaorangia ahau e te Atua, ka tae mai hoki ngā wai ki roto ki tōku wairua. 
Ka tapoko ahau ki te oru hōhonu, ki te wāhi kāhore nei he tūnga; kua tae ahau ki ngā wai hōhonu, ngaro iho ahau i ngā waipuke. 
Kua ruwha ahau i tāku tangi; kua maroke tōku korokoro. Pakoko kau ōku kanohi i ahau e tatari nei ki tōku Atua. 
Tini kē i ngā makawe o tōku mātenga te hunga e kino noa ana ki ahau; he kaha rawa te hunga e mauāhara noa ana ki ahau, e mea nei kia whakamatea ahau. Utua ana e ahau i reira ngā mea kīhai i tangohia e ahau. 
E te Atua, e mātau ana koe ki tōku kūware; kāhore hoki ōku hē e ngaro i a koe. 
E te Ariki, e Ihowā o ngā mano kaua te hunga e tatari ana ki a koe e whakamā i ahau; e te Atua o Īharaira, kei numinumi kau i ahau te hunga e rapu ana i a koe. 
Mōu hoki ahau i waiho ai hei tāwainga; ngaro iho tōku mata i te whakamā. 
He tangata kē ahau ki ōku hoa ake; hei tautangata ki ngā tama a tōku whaea. 
Ka pau hoki ahau i te aroha ki tōu whare; kua tau anō ki ahau ngā tāwai a te hunga e tāwai ana ki a koe. 
I ahau i tangi, i whakatiki hei whiu i tōku wairua, ka waiho tēnā hei tāwainga mōku. 
I kākahu hoki ahau i te kākahu taratara mōku, ā, i waiho hei whakatauki mā rātou. 
Kei te kōrero kino mōku te hunga e noho ana i te kūwaha; waiatatia ana ahau e te hunga haurangi wāina. 
Ko ahau ia, ki a koe tāku īnoi, e Ihowā, i te wā e manakohia ai; whakahokia mai he kupu ki ahau, e te Atua, i runga i te nui o tōu aroha, o te pono o tāu whakaoranga. 
Whakaorangia ahau i roto i te oru, kei toremi; kia ora ahau i te hunga e kino ana ki ahau, i ngā wai hōhonu anō hoki. 
Kei ngaro ahau i te waipuke, kei horomia e te rire; kei kopia anō te waha o te poka ki runga ki ahau. 
E Ihowā whakahokia mai he kupu ki ahau; he pai hoki tōu atawhai: tahuri mai ki ahau, kia rite ki te nui o āu arohatanga. 
Ā, kaua e hunā tōu mata ki tāu pononga; e pōuri ana hoki ahau: hohoro te whakahoki kupu mai ki ahau. 
Whakatata mai ki tōku wairua, hokona; whakaorangia ahau, e mahi nei ōku hoariri. 
E mātau ana koe ki tōku tāwainga, ki tōku whakamā, ki tōku numinumi; tōu aroaro ōku hoariri katoa. 
Marū noa tōku ngākau i te tāwai; ā, kī tonu ahau i te pōuri; i titiro ahau ki tētahi hei aroha mai, ā, kore ake; ki ētahi hei whakamārie, ā, kīhai i kitea. 
I hōmai he au hei kai māku; i tōku matewaitanga anō i whakainumia ahau ki te winika. 
Kia meinga tā rātou tēpu i tō rātou aroaro hei māhanga; hei rore hoki i tō rātou wā rangimārie. 
Kia whakapōuritia ō rātou kanohi, kei kite rātou; kia wiri tonu hoki ō rātou hope. 
Ringihia atu tōu riri ki runga ki a rātou, kia mau hoki rātou i tōu ārita, i tōu weriweri. 
Kia ururuatia tō rātou nohoanga; kaua tētahi e noho ki ō rātou tēneti. 
Mō rātou i tūkino i te tangata i whiua nei e koe; ā, kōrerotia ana e rātou te pōuri o te hunga i werohia e koe. 
Tāpiritia he kino ki runga ki tō rātou kino; kaua hoki rātou e tukua kia tomo ki tōu tika. 
Kia murua atu rātou i te pukapuka o te ora, kaua anō e tuhituhia ki roto ki te hunga tika. 
Ko ahau ia, he rawakore, he pōuri; kia whakateiteitia ake ahau, e te Atua, e tāu whakaoranga. 
Ka whakamoemiti tāku waiata ki te ingoa o te Atua, ka whakanui anō tāku whakawhetai i a ia. 
Pai rawa tēnei ki a Ihowā i te pūru, i te kau, i te mea whai haona, whai maikuku. 
Kua kite te hunga māhaki, kua hari; ka ora anō ō koutou ngākau, e te hunga e rapu nei i te Atua. 
Nō te mea ka rongo a Ihowā ki ngā rawakore, e kore anō e whakahāwea ki āna herehere. 
Kia whakamoemiti te rangi me te whenua ki a ia, ngā moana, me ngā mea katoa e tere ana i roto. 
Nō te mea tērā e whakaorangia e te Atua a Hiona, ka hangā anō e ia ngā pā o Hūrā; ā, ka noho rātou ki reira, ka riro hoki a reira i a rātou; 
ā, ka nohoia a reira e ngā uri o āna pononga; hei kāinga tupu anō a reira mō te hunga e aroha ana ki tōna ingoa. 
