﻿Waiata.
71.
Ko koe tāku e whakawhirinaki ai, e Ihowā; kei whakamā ahau ake ake. 
Whakaorangia ahau, i runga i tōu tika, kia mawhiti anō ahau; tahuri mai tōu taringa ki ahau, whakaorangia hoki ahau. 
Kia ai koe hei teko e noho ai ahau, hei hokihokinga tonutanga atu mōku; kua kīia iho ahau e koe kia whakaorangia, ko koe nei hoki tōku kōhatu, tōku pourewa. 
Whakaorangia ahau, e tōku Atua, i te ringa o te tangata kino, i te ringa o te whanokē, o te nanakia. 
Ko koe nei hoki, e te Ariki, e Ihowā, tāku e tūmanako atu nei, tāku e whakawhirinaki nei nō tōku tamarikitanga ake anō. 
Nāu ahau i tautoko ake nō te kōpū mai anō; nāu ahau i tango mai i roto i ngā whēkau o tōku whaea. Ko koe tāku e whakamoemiti tonu ai. 
He mīharotanga ahau nā te tini; ko koe ia tōku piringa kaha. 
Kia kī tōku māngai i te whakamoemiti ki a koe, i tōu hōnore i te roa o te rā. 
Kaua ahau e pangā ā te wā o te koroheketanga, kaua ahau e whakarērea ina hemo tōku kaha. 
E kōrerotia ana hoki ahau e ōku hoariri, ā, e rūnanga tahi ana te hunga e whanga ana ki tōku wairua. 
E mea ana, “Kua whakarērea ia e te Atua; whāia, hopukia; kāhore hoki tētahi hei whakaora.” 
E te Atua, kei matara atu koe i ahau; e tōku Atua, hohoro ki te āwhina i ahau. 
Kia whakamā, kia pau ngā hoariri o tōku wairua; kia hīpokina ki te tāwai, ki te whakamā, te hunga e rapu ana i te hē mōku. 
Ko ahau ia, ka tūmanako tonu; ka hono tonu anō te whakamoemiti ki a koe. 
Mā tōku māngai e whakakite tōu tika, tāu whakaoranga i te roa o te rā; kāhore hoki ahau e mōhio e hia rānei. 
Ka haere ahau i runga i te kaha o te Ariki, o Ihowā, ka whakahuatia e ahau tōu tika, tōu anake. 
E te Atua, he mea whakaako ahau nāu, nō tōku tamarikitanga ake; ā, he whakapuaki tāku i āu mahi whakamīharo ā mohoa noa nei. 
Nā, kaua ahau e whakarērea, e te Atua, ā koroheke noa, hina noa ahau, kia whakakitea rā anō e ahau tōu kaha ki tēnei whakatupuranga, tōu nui ki ngā tāngata katoa e puta mai ā mua. 
Kei runga rawa anō tōu tika, e te Atua, he nui nei hoki āu mahi; e te Atua, ko wai te rite ki a koe? 
He nui, he kino ngā pōuritanga ngākau i whakakitea mai e koe ki a mātou; tērā anō koe ka whakahauora i a mātou, ka whakahoki ake anō i a mātou i ngā wāhi hōhonu o te whenua. 
Whakaraneatia e koe tōku nui, ā, tahuri mai anō ka whakamārie i ahau. 
Ka whakamoemiti ahau ki a koe i runga i te hātere, arā ki tōu pono, e tōku Atua; ka hīmene ahau ki a koe i runga i te hāpa, e te Mea Tapu o Īharaira. 
Ka tino hari ōku ngutu ua hīmene ahau ki a koe; me tōku wairua anō i hokona nei e koe. 
Ka kōrerotia hoki e tōku arero tōu tika i te roa o te rā; kua whakamā nei hoki, kua numinumi kau te hunga i rapu i te hē mōku. 
