﻿Waiata.
72.
Nā Horomona. Hōmai e te Atua, āu whakaritenga ki te kīngi, me tōu tika ki te tama a te kīngi. 
Māna e whakawā tōu iwi i runga i te tika, āu rawakore i runga i te whakawā tika. 
Ka kawea mai e ngā maunga te rongo mau ki te iwi, e ngā pukepuke i runga i te tika. 
Ka whakawā ia mō ngā ware o te iwi; ka whakaorangia e ia ngā tamariki a te rawakore; mongamonga noa i a ia te kaitūkino. 
I te rā e mau ana, i te marama hoki, ka pērā te mau o tō rātou wehi ki a koe i ngā whakatupuranga katoa. 
E heke iho ia ānō he ua ki runga ki te kotinga tarutaru, me ngā ua e whakamākūkū nei i te whenua. 
Ka tupu te tangata tika i ōna rā; tōna roa anō o te āta noho, ā, kore noa te marama. 
Ka kīngi ia i tēnei moana, ā tae noa ki tētahi moana, i te awa, ā ngā pito atu anō o te whenua. 
Ka piko ki tōna aroaro te hunga o te koraha; ā, ka mitimiti ōna hoariri i te puehu. 
Ka maua mai he hākari e ngā kīngi o Tarahihi, o ngā motu; ka kawea mai he tahua e ngā kīngi o Hēpā, o Tepa. 
Āe, ka koropiko ngā kīngi katoa ki a ia; ka mahi ngā iwi katoa ki a ia. 
Ka ora hoki i a ia te rawakore ua tangi atu, te ware hoki me te tangata kāhore nei ōna kaiāwhina. 
E tohu ia i te tangata iti, i te rawakore; ka ora anō i a ia ngā wairua o ngā rawakore. 
Ka hokona e ia tō rātou wairua i roto i te tūkino, i te tutū, he mea utu nui hoki ō rātou toto ki tāna titiro. 
Ā, e ora rātou! Ka hoatu anō ki a ia he kōura nō Hēpā. Ka tukua tonutia hoki te īnoi mōna; ka whakapaingia ia i tēnei rā, i tēnei rā. 
He kutanga wīti tērā i runga i te whenua, i te tihi o ngā maunga; ngarue ana ōna hua, ānō ko Repanōna, ā, ka rite te tupu o ngā tāngata o te pā ki tō te tarutaru o te whenua. 
Ka mau tonu tōna ingoa ake ake; ka rite tōna ingoa ki te rā te pūmau. Kei roto i a ia te manaaki mō te tangata; ka kōrerotia tōna koa e ngā iwi katoa. 
Kia whakapaingia a Ihowā, te Atua, te Atua o Īharaira; ko ia nei anake hei mahi i ngā mahi whakamīharo. 
Kia whakapaingia anō tōna ingoa korōria mō ake tonu atu; kia kī katoa hoki te whenua i tōna korōria. 
Ko te mutunga tēnei o ngā īnoi a Rāwiri, a te tama a Hehe. 
