﻿Waiata.
77.
Ki te tino kaiwhakatangi, ki a Ierutunu. He hīmene nā Āhapa. Ki te Atua tōku reo, e karanga nei ahau, ki te Atua tōku reo, ā, tērā e tahuri mai tōna taringa ki ahau. 
I rapu ahau ki te Ariki i te rā o tōku pōuri; mārō tonu tōku ringa i te pō, kīhai anō i pēpeke; kīhai tōku wairua i pai kia whakamārietia. 
E mahara ana ahau ki te Atua, ā, e pōuri ana; kei te whakaaroaro, ā, ngaro iho tōku wairua. Hera 
E puritia ana e koe ōku kanohi kia mataara tonu; he pōuri ahau, tē āhei te kōrero. 
Ka hoki ōku whakaaro ki ngā rā onamata, ki ngā tau o tua iho. 
E whakamahara ana ahau ki tāku waiata i te pō, e kōrerorero ana ki tōku ngākau, e rapurapu ana tōku wairua. 
“Tērā rānei te Ariki e panga tonu ake ake, ā, heoi anō rānei āna manakohanga mai? 
Kua kāhore rānei tāna mahi tohu mō ake tonu atu? Kua whati rānei tāna kupu ā ake ake? 
Kua wareware rānei te Atua ki te atawhai? Kua riri rānei ia, ā, tūtakina atu ana e ia tōna aroha?” Hera 
Nā, ka mea ahau, “Ko tōku ngoikore tēnei: otirā ka mahara ahau ki ngā tau o te ringa matau o te Runga Rawa.” 
Ka mahara ahau ki ngā mahi a Ihowā; āe rā, ka mahara ahau ki āu mea whakamīharo o tua iho. 
Ka whakaaro hoki ahau ki āu meatanga katoa, ka pūrākau ki āu mahi. 
E te Atua, kei te wāhi tapu tōu ara. Ko wai te atua nui hei rite ki te Atua? 
Ko koe te Atua e mahi nei i ngā mea whakamīharo; kua whakapuakina e koe tōu kaha i waenganui o ngā iwi. 
Hokona ana e tōu ringa tāu iwi, ngā tama a Hākopa rāua ko Hōhepa. Hera 
I kite ngā wai i a koe, e te Atua, i kite ngā wai i a koe, mataku ana; i oho anō ngā rire. 
Ringihia ana he wai e ngā kapua, puaki ana te haruru o ngā rangi; rererere ana āu pere. 
I roto i te āwhiowhio te haruru o tāu whatitiri; mārama noa te ao i ngā uira; wiri ana te whenua, oioi ana. 
I te moana tōu ara, i ngā wai nui tōu huarahi, e kore anō e kitea ōu takahanga. 
He mea ārahi e koe tāu iwi ānō he kāhui, arā e te ringa o Mohi rāua ko Ārona. 
