﻿Waiata.
78.
He Makiri nā Āhapa. Kia anga mai te taringa, e tōku iwi, ki tāku ture; tahuri mai ō koutou taringa ki ngā kupu a tōku māngai. 
Ka puaki te kupu whakarite i tōku māngai, ka kōrerotia e ahau ngā mea ngaro onamata – 
i rongo nei, i mātau nei tātou, kōrero ai hoki ō tātou mātua ki a tātou. 
E kore e hunā e mātou i ā rātou tamariki; me whakaatu ki tō muri whakatupuranga ngā whakamoemiti ki a Ihowā, me tōna kaha, me āna mahi whakamīharo i mea ai ia. 
Kua pūmau hoki i a ia he whakaaturanga i roto i a Hākopa, kua takoto he ture i roto i a Īharaira; ā, whakahaua mai ana e ia ō tātou tūpuna, kia whakaakona ki ā rātou tamariki; 
kia mātauria ai e tō muri whakatupuranga, e ngā tamariki e whānau, e ara ake ā mua, mō tā rātou whakaatu ki ā rātou tamariki. 
Kia ū ai tā rātou tūmanako ki te Atua, kei wareware hoki ki ngā mahi a te Atua; engari kia mau ki āna whakahau. 
Kei rite hoki ki ō rātou tūpuna, ki te whakatupuranga whakakeke, tutū, ki te whakatupuranga kīhai nei i whakatikatika i tō rātou ngākau, kīhai hoki i ū tō rātou wairua ki te Atua. 
He hunga mau patu ngā tama a Ēparaima, he hunga hāpai kōpere, heoi tahuri ana rātou i te rā o te tatauranga. 
Kīhai i puritia e rātou te kawenata a te Atua; kīhai anō i pai ki te haere i tāna ture. 
Heoi, kua wareware ki āna mahi, me āna mea whakamīharo i whakakitea e ia ki a rātou. 
He mea whakamīharo āna mahi i te aroaro o ō rātou tūpuna, i te whenua o Īhipa, i te pārae o Toana. 
Tapahia ana e ia te moana, ā, meinga ana rātou kia whiti; tū ake i a ia ngā wai ānō he pūranga. 
He mea ārahi rātou e ia i te awatea ki te kapua; i te roa hoki o te pō ki te mārama o te ahi. 
I wāhia e ia ngā kōhatu i te koraha; ā, me te mea nō ngā rire nui tana wai hei inu mā rātou. 
Puta mai ana i a ia he awa i roto i te kāmaka; meinga ana ngā wai kia heke, ānō he waipuke. 
Heoi, ka hara anō rātou ki a ia; whakatoi ana ki te Runga Rawa i te koraha. 
Nā, kei te whakamātautau tō rātou ngākau i te Atua, kei te īnoi kai mā tō rātou hiahia. 
I kōrero kino anō rātou ki te Atua, i mea; “E āhei rānei i te Atua te taka he tēpu ki te koraha? 
Nanā, ko tāna patunga i te kōhatu, ka pakaru mai te wai, ā, puke ana ngā awa; e taea anō rānei e ia te hōmai taro, e pae rānei i a ia he kikokiko mā tāna iwi?” 
Nā, ko te rongonga o Ihowā, nā, ka riri; ā, toro ana te kāpura ki a Hākopa, puta ake ana te riri ki a Īharaira; 
mō rātou kīhai i whakapono ki te Atua, kīhai anō i whakawhirinaki ki tāna whakaoranga. 
Nāna nei hoki i whakahau ngā kapua i runga, i whakatuwhera ngā tatau o te rangi; 
ā, whakauaina iho te mana ki runga ki a rātou hei kai; hōmai ana hoki e ia te wīti o te rangi mā rātou. 
Kai ana te tangata i tā te anahera kai; i tukua e ia he kai mā rātou, ā mākona noa. 
I whakaohokia e ia te marangai i te rangi; i tākina anō te tonga e tōna kaha. 
Ā, whakauaina iho e ia te kikokiko ki a rātou ānō he puehu; he manu whai pākau ānō he one nō te moana. 
Ā, whakangahorotia iho e ia ki waenganui i tō rātou puni; ki ō rātou nohoanga ā tawhio noa. 
Nā, kai ana rātou, tino mākona; i tukua hoki e ia ki a rātou tā rātou i hiahia ai. 
Kīhai rātou i ngaruru ki tā rātou i hiahia ai; ā, i roto tonu tā rātou kai i ō rātou māngai, 
nā, ka pā te riri o te Atua ki a rātou, ā, patua iho e ia te hunga tetere o rātou; piko ana i a ia ngā taitamariki o Īharaira. 
Ahakoa pā katoa tēnei, i hara anō rātou; kīhai anō i whakapono ki āna mahi whakamīharo. 
I whakapaua ai e ia ō rātou rā ki te horihori, ō rātou tau ki te pōtatutatu. 
Ka patua rātou e ia, nā, ka rapu rātou i a ia, ā, ka hoki, ka ui wawe ki te Atua. 
Ka mahara hoki ko te Atua tō rātou kōhatu, ko te Atua, ko te Runga Rawa, tō rātou kaihoko. 
Otiia kei te patipati ō rātou māngai ki a ia, ā, teka ana ō rātou arero ki a ia. 
Kīhai hoki tō rātou ngākau i tika ki a ia; kīhai anō rātou i ū ki tāna kawenata. 
Ko tāna ia, he aroha; hīpokina ana e ia te hē, kīhai anō i whakangaro. Āe rā, he maha āna whakahokinga iho i tōna riri, ā, kīhai i oho katoa tōna riri. 
I mahara hoki ia he kikokiko nei rātou; he hau e pahure atu ana, ā, e kore e hoki mai. 
Anō te tini o ā rātou whakatoinga i a ia i te koraha, o ā rātou whakapōuritanga i a ia i te tahora! 
Hoki whakamuri ana rātou, whakamātautau ana i te Atua; whakatoia ana e rātou te Mea Tapu o Īharaira. 
Kīhai rātou i mahara ki tōna ringa, ki te rā i whakaorangia ai rātou e ia i te hoariri; 
ki tāna meatanga i āna tohu ki Īhipa, i āna merekara ki te pārae o Toana. 
I puta kē ai i a ia ō rātou awa hei toto, me ō rātou manga wai, tē inu ai rātou. 
I tonoa ai e ia he huihuinga namu ki a rātou, ā, pau iho rātou; he poroka, i hunā ai rātou. 
Ā, hoatu ana e ia ō rātou hua ki te moka; me tō rātou māuiui ki te māwhitiwhiti. 
Whakamatea ana e ia ā rātou wāina ki te whatu, ā rātou rākau hikamora ki te haupapa. 
Tukua ana e ia ā rātou kararehe mā te whatu, ā rātou kāhui mā ngā uira. 
I tukua whakareretia e ia ki a rātou tōna riri, āritarita, weriweri, me te raruraru; he whakaeke nā ngā anahera kino. 
Ā, whakatikaia ana e ia he ara mō tōna riri; kīhai i tohungia tō rātou wairua kei mate, otiia, tukua ana e ia tō rātou ora ki te mate urutā. 
Nā, patua iho e ia ngā mātāmua i Īhipa, te muanga o tō rātou kaha i ngā tēneti o Hama. 
Otirā, ārahina ana e ia āna ake tāngata ānō he hipi; whakahaerea ana rātou e ia i te koraha anō he kāhui. 
Nā, ka ārahina mārietia rātou e ia, tē wehi rātou; ko ō rātou hoariri ia taupokina iho e te moana. 
Nā, ka kawea rātou e ia ki te rohe o tōna wāhi tapu, ki tēnei maunga, i hokona nei e tōna matau. 
Peia ana e ia ngā tauiwi i tō rātou aroaro; ā, wehea ana e ia he kāinga mō rātou ki te aho, whakanohoia iho ngā hapū o Īharaira ki ō rātou tēneti. 
Heoi, ka whakamātauria, ka whakatoia e rātou te Atua, te Runga Rawa; kīhai hoki i mau ki āna whakaaturanga; 
ā, hoki whakamuri ana, mahi hīanga ana, pērā ana me ō rātou mātua; parori kē ana rātou, he pērā me te kōpere tinihanga. 
Nā, ko ō rātou wāhi tiketike hei whakapātaritari i a ia; ko ō rātou whakapakoko hei mea i a ia kia hae. 
I te rongonga o te Atua, ka riri, ka tino whakarihariha hoki ki a Īharaira. 
Ā, mahue ake i a ia te tapenākara o Hiro, te tēneti i whakatūria e ia ki waenganui i ngā tāngata; 
ā, tukua ana e ia tōna kaha hei whakarau, tōna korōria ki te ringa o te hoariri. 
I tukua atu anō e ia tāna iwi mā te hoari; ā, i riri ki tōna kāinga tupu. 
Pau ake ā rātou taitama i te ahi; kīhai anō ā rātou kōtiro i mārenatia. 
I hinga ō rātou tohunga i te hoari; kīhai hoki i tangi ā rātou pouaru. 
Nā, ka maranga te Ariki ānō ko tētahi i te moe, me te tangata kaha e hāmama ana i te wāina. 
Ā, patua iho e ia a muri o ōna hoariri, meinga ana rātou e ia hei taunutanga mō ake tonu atu. 
I whakakāhore anō ia ki te tēneti o Hōhepa; ā, kīhai i whiriwhiri i te hapū o Ēparaima; 
heoi, ko te hapū o Hūrā tāna i whiriwhiri ai, ko Maunga Hiona tāna i aroha ai. 
Ā, whakatūria ana e ia tōna wāhi tapu kia pērā me ngā wāhi teitei; me te whenua i whakapūmautia e ia mō ake tonu atu. 
I whiriwhiria anō e ia a Rāwiri, tāna pononga, he mea tango nāna i ngā kāinga hipi; 
mauria ana mai e ia i te whai i ngā hipi whāereere, hei whāngai i a Hākopa, i tāna iwi, i a Īharaira hoki, i tōna kāinga tupu. 
Ā, rite tonu ki te tapatahi o tōna ngākau tāna whāngai i a rātou; he ārahi mōhio hoki tā tōna ringa i a rātou. 
