﻿Waiata.
79.
He hīmene nā Āhapa. E te Atua, kua tae mai ngā tauiwi ki tōu kāinga tupu; kua noa i a rātou tōu temepara tapu, kua waiho a Hiruhārama kia pūranga kau ana. 
Ko ngā tinana mate o āu pononga kua hoatu e rātou hei kai mā ngā manu o te rangi, ko te kikokiko o tāu hunga tapu mā ngā kīrehe o te whenua. 
Ko ō rātou toto, ringihia ake e rātou ānō he wai, ki ngā taha o Hiruhārama; kāhore hoki he tangata hei tanu i a rātou. 
Kua waiho mātou hei tāwainga mā ō mātou hoa, hei katanga mā te hunga i tētahi taha, i tētahi taha o mātou. 
Kia pēhea te roa, e Ihowā? E riri tonu rānei koe ake ake? E ngiha tonu rānei tōu hae me he kāpura? 
Ringihia tōu riri ki ngā tauiwi kāhore nei e mātau ki a koe, ki ngā rangatiratanga kāhore nei e karanga ki tōu ingoa. 
Kua pau hoki a Hākopa i a rātou, kua ururua i a rātou tōna nohoanga. 
Kaua rā e maharatia ngā kino o ō mātou tūpuna; kia hohoro tōu aroha ki mua i a mātou; kua whakaititia rawatia hoki mātou. 
Āwhinatia mātou, e te Atua o tō mātou whakaoranga, kia whakakorōriatia ai tōu ingoa; whakaorangia mātou, hīpokina hoki ō mātou hara, he mahara ki tōu ingoa. 
Kia mea koia ngā tauiwi, “Kei hea tō rātou Atua?” Kia kite atu mātou e mātau ana ngā tauiwi ki te whakatakinga i te toto o āu pononga i whakahekea nei. 
Kia tae atu ki tōu aroaro te auē a te herehere; kia rite ki te nui o tōu kaha tāu whakaora i te hunga e meatia ana kia mate. 
Takiwhitutia atu te utu e hoatu e koe ki ngā uma o ō mātou hoa mō tā rātou tāwai, e tāwai nei rātou ki a koe, e te Ariki. 
Pēnei ka whakawhetai mātou, tāu iwi, ngā hipi hoki e hēpara nei koe, ki a koe ake ake; ka whakakitea e mātou te whakamoemiti ki a koe, ki ngā whakatupuranga katoa. 
