﻿Waiata.
80.
Ki te tino kaiwhakatangi: Hohanimi Erutu. He hīmene nā Āhapa. Tahuri mai tōu taringa, e te Hēpara o Īharaira, e ārahi nei i a Hōhepa ānō he kāhui hipi! Whiti mai koe e noho mai nā i waenganui i ngā kerupima; 
whakaohoohokia tōu kaha i te aroaro o Ēparaima, o Pineamine, o Mānahi; ā, haere mai ki te whakaora i a mātou. 
Whakahokia ake mātou, e te Atua; kia mārama mai tōu mata, ā, ka ora mātou. 
E Ihowā, e te Atua o ngā mano, kia pēhea ake te roa o tōu riri ki te īnoi a tāu iwi? 
Kua whāngaia mai e koe he roimata hei taro mā rātou, he nui hoki te mēhua roimata kua hōmai nei e koe kia inumia e rātou. 
Kua meinga mātou e koe hei totohetanga mā ō mātou hoa, ā, e kataina ana mātou e ō mātou hoariri. 
Whakahokia ake mātou, e te Atua o ngā mano; kia mārama mai tōu mata, ā, ka ora mātou. 
I maua mai e koe he wāina i Īhipa; ka oti i a koe ngā tauiwi te panga, nā whakatōkia iho e koe. 
I whakapaia e koe he tūnga mōna; nā, ka hou ōna pakiaka, ā, ka kapi te whenua. 
Taumarumaru ana tōna ata ki runga ki ngā pukepuke; ko ōna manga rite tonu ki ngā hīta a te Atua. 
I tautotoro atu ōna manga ki te moana, ōna rārā ki te awa. 
He aha i pākaruhia ai e koe ōna taiepa ki raro, kia kōwhakiwhakia ai ia e ngā tāngata katoa e tika ana i te ara? 
Mongamonga noa i te poaka toa o te ngahere, e kainga ana e te kīrehe mohoao o te pārae. 
Tahuri mai anō, e te Atua o ngā mano, e īnoi atu nei mātou; titiro iho i te rangi, kia kite mai koe, ka toro mai i tēnei wāina, 
i te rākau i whakatōkia e tōu matau, i te manga hoki i meinga e koe kia pakari māu. 
Kua pau i te ahi, kua tuaina ki raro; ngaro iho rātou i te riri o tōu mata. 
Waiho tōu ringa i runga i te tangata o tōu matau, i te tama a te tangata i whakakahangia e koe māu. 
Pēnei e kore mātou e hoki atu i a koe; whakahauorangia mātou, ā, ka karanga mātou ki tōu ingoa. 
Whakahokia ake mātou, e Ihowā, e te Atua o ngā mano; kia mārama mai tōu mata, ā, ka ora mātou. 
