﻿Waiata.
83.
He waiata, he hīmene, nā Āhapa. E te Atua, kei wahangū koe, kei whakarongo puku, kei āta noho, e te Atua. 
He mea hoki, tēnei ōu hoariri te ngangau nei, ā, kua ara ngā mātenga o te hunga e kino ana ki a koe. 
Kua āta ngārahu rātou ki tāu iwi, e whakatakoto kōrero ana hoki rātou mō āu mea huna. 
Kua mea nei rātou, “Tēnā, tātou ka huna i a rātou, kia kore ai tēnā iwi; kia kaua ai hoki e maharatia te ingoa o Īharaira ā muri ake nei.” 
Kua kotahi tō rātou ngākau i a rātou e rūnanga ana; kua whakatakoto rātou he tikanga kino ki a koe – 
ko ngā tēneti o Ēroma, o ngā Ihimaeri, o Moapa, o ngā Hakarini, 
a Kepara, a Āmona, a Amareke, ngā Pirihitini, me ngā tāngata o Tāira. 
Kua uru hoki a Ahiria ki roto ki a rātou; kua āwhinatia e rātou ngā tamariki a Rota. Hera 
Pērātia rātou me Miriana; me Hihera, me Iapini, i te awa i Kihona; 
i mate nei ki Eneroro, i waiho nei hei whakawairākau mō te whenua. 
Kia rite ō rātou rangatira ki a Orepe rāua ko Teepe, āe, ō rātou ariki katoa hoki ki a Tepa rāua ko Taramuna; 
mō rātou i mea, “Tātou ka tango i ngā kāinga o te Atua mō tātou.” 
E tōku Atua, meinga rātou kia rite ki te āwhiowhio puehu, ki te pāpapa e pūhia ana e te hau. 
Kia rite ki te ahi e kai ana i te ngahere, ki te mura hoki e toro ai ngā maunga; 
kia pērā te whai o tāu āwhā i a rātou, tāu whakaohorere hoki i a rātou ki tāu paroro. 
Whakakīia ō rātou kanohi ki te whakamā; kia rapu ai rātou ki tōu ingoa, e Ihowā. 
Kia whakamā, kia ohorere rātou ake ake; āe, kia numinumi rātou, kia ngaro hoki. 
Kia mātau ai rātou, ko koe anake, ko Ihowā nei tōu ingoa, te Runga Rawa i te whenua katoa. 
