﻿Waiata.
90.
He īnoi nā Mohi, nā te tangata a te Atua. E te Ariki, ko koe tō mātou nohoanga i ngā whakatupuranga katoa. 
Kāhore anō i whānau noa ngā maunga, kāhore i hangā e koe te whenua me te ao, ko koe te Atua nō tua whakarere ā ake tonu atu. 
E whakahokia ana e koe te tangata kia mongamonga noa, ā, e mea ana, “E hoki, e ngā tama a te tangata.” 
Ki tāu titiro hoki, he rite ngā tau kotahi mano ki te rā onanahi, kua pahure atu nei, ki te mataaratanga hoki i te pō. 
Me te mea nā te waipuke tāu kāhakinga i a rātou, he moe rātou; i te ata ānō he tarutaru e tupu ana; 
i te ata e tupu ana, e pihi ana; i te ahiahi kua kotia, kua maroke. 
Kua hemo nei hoki mātou i tōu riri; ka ohorere hoki i tōu āritatanga. 
Kua makā e koe ō mātou kino ki tōu aroaro, ō mātou mea huna ki te mārama o tōu mata. 
Ka pau ō mātou rā katoa, me te riri anō koe; hemo ake ō mātou tau ānō he kōrero e kōrerotia ana. 
Ko ngā rā o ō mātou tau e whitu tekau tau; ā, ki te whai kaha, ka waru tekau tau; heoi he mahi māuiui, he pōuri tō rātou kaha; ka hohoro hoki te hātepea atu, ā, ka rere atu mātou. 
Ko wai te mātau ana ki te kaha o tōu riri? Rite pū ki te wehi ki a koe tōu riri. 
Ākona mātou ki te tatau i ō mātou rā, kia anga ai te ngākau ki te whakaaro. 
Hoki mai, e Ihowā, kia pēhea ake te roa? Ā, kia puta kē he whakaaro mōu ki āu pononga. 
Kia nā mātou i te ata i tāu mahi tohu; kia hari ai mātou, kia koa ai, i ō mātou rā katoa. 
Whakaharitia mātou, kia rite ki ngā rā i whakawhiua ai mātou e koe, ki ngā tau i kite ai mātou i te kino. 
Kia puta mai tāu mahi ki āu pononga, me tōu korōria ki ā rātou tamariki. 
Ā, hei runga i a mātou te ātaahua o Ihowā, o tō mātou Atua; whakapūmautia anō ki a mātou te mahi a ō mātou ringa, āe rā, te mahi a ō mātou ringa, whakapūmautia e koe. 
