﻿Waiata.
94.
E Ihowā, e te Atua, e te kairapu utu; e te Atua, e te kairapu utu, tīaho mai! 
E ara, e te Kaiwhakawā o te whenua; hoatu te utu e rite ana ki te hunga whakakake. 
Kia pēhea te roa, e Ihowā, o te hunga kino nei, kia pēhea te roa o te hunga kino e whakamanamana ana? 
Kei te kōrero whakatū rātou, kei te kōrero whakahī; kei te kōrero whakapehapeha ki a rātou ngā kaimahi katoa i te kino. 
Mongamonga noa tāu iwi i a rātou e Ihowā; e tūkinotia ana e rātou tōu kāinga tupu. 
E patua ana e rātou te pouaru, te manene; e kōhuru ana i te pani, 
ā, e mea ana, “E kore a Ihowā e kite; e kore e maharatia e te Atua o Hākopa.” 
Kia mātau, e ngā pōauau o te iwi; āhea anō koutou whai mahara ai, e ngā kūware? 
Ko te kaiwhakatō o te taringa, e kore rānei ia e rongo? Ko te kaihanga o te kanohi, e kore ianei ia e kite? 
Ko te kaipapaki o ngā iwi e kore rānei ia e papaki, arā ko te kaiwhakaako nei i te tangata kia mōhio? 
E mātau ana a Ihowā ki ngā whakaaro o te tangata, he mea teka noa. 
Ka hari te tangata e pākia ana e koe, e Ihowā; e whakaakona ana i roto i tāu ture. 
Kia mārie ai tōna ngākau i a koe i ngā rā o te hē, ā, keria noatia iho te poka mō te tangata kino. 
E kore hoki a Ihowā e panga i tāna iwi, e kore anō e whakarere i tōna kāinga tupu. 
Engari e hoki te whakawā ki te tika; ā, e arumia e ngā tāngata ngākau tika katoa. 
Ko wai tōku hei whakatika ake ki te hunga kino? Ko wai tōku hei tū ake ki ngā kaimahi i te hara? 
Mehemea kaua a Ihowā hei āwhina mōku, pēnei kua noho kupukore noa atu tōku wairua. 
I tāku meatanga, “Ka paheke tōku waewae,” nā tāu mahi tohu, e Ihowā, ahau i tautoko ake. 
I ōku whakaaronga maha i roto i tōku ngākau ko āu whakamārie tōku oranga ngākau. 
Tērā rānei e whakahoa ki a koe te torōna o te kino, e whakatakoto nei i te mahi nanakia hei ture? 
Kei te whakahuihui rātou ki te poke i te wairua o te tangata tika, e mea ana kia heke te toto harakore. 
Ko Ihowā ia tōku pā teko; ko tōku Atua hei kōhatu piringa mōku. 
Ā, nāna i whakahoki tō rātou kino ki runga ki a rātou, ā, tērā ia e whakangaro i a rātou i roto i ō rātou kino; mā Ihowā, mā tō tātou Atua rātou e whakangaro. 
