﻿Waiata.
99.
Ko Ihowā te Kīngi; kia wiri ngā iwi; E noho ana ia i waenganui i ngā kerupima; kia ngāueue te whenua. 
He nui a Ihowā i Hiona; kei runga ake ia i ngā iwi katoa. 
Kia whakamoemiti rātou ki tōu ingoa nui, whakamataku. He tapu ia! 
E matenui ana hoki te kaha o te kīngi ki te whakawā tika; ko koe hei whakapūmau i te pono; he whakawā tika, he hēkore tāu mahi i roto i a Hākopa. 
Whakanuia a Ihowā, tō tātou Atua; koropiko ki tōna tūranga waewae. He tapu ia! 
Ko Mohi rāua ko Ārona i roto i āna tohunga, me Hamuera i roto i te hunga e karanga ana ki tōna ingoa. I karanga rātou ki a Ihowā, ā, whakahoki kupu ana mai ia ki a rātou. 
I kōrero ia ki a rātou i roto i te pou kapua; i pupuri rātou i āna whakaaturanga, i te tikanga i whakatakotoria e ia ki a rātou. 
E Ihowā, e tō mātou Atua, i whakahoki kupu koe ki a rātou; he Atua tohu koe i a rātou, otiia, i rapu utu anō koe mō ā rātou mahi. 
Whakanuia ā Ihowā, tō tātou Atua, koropiko atu i tōna maunga tapu; he tapu hoki ā Ihowā, tō tātou Atua. 
