﻿Waiata.
107.
Whakawhetai ki a Ihowā, he pai hoki ia; he pūmau tonu hoki tāna mahi tohu. 
Kia pēnā anō te kōrero a te hunga i hokona e Ihowā, i hokona nei e ia i roto i te ringa o te hoariri; 
i kohikohia nei i ngā whenua, i te rāwhiti, i te uru, i te raki, i te tonga. 
I hāereere rātou i te koraha i te wāhi mokemoke, tē kitea tētahi pā hei nohoanga. 
I matekai rātou, i matewai; hemo noa tō rātou wairua i roto i a rātou. 
Nā, ka tangi rātou ki a Ihowā i tō rātou pōuri; ā, whakaorangia ana rātou e ia i ō rātou mate; 
ā, ārahina ana e ia rā te ara tika; kia haere ai ki te pā hei nohoanga. 
Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata! 
E whakamākonatia ana hoki e ia te wairua hiahia; ko te wairua hiakai, whakakīia ana e ia ki te pai. 
Ko te hunga i noho i te pōuri, i te ātārangi o te mate, he mea here ki te mamae, ki te rino; 
mō rātou i tutū ki ngā kupu a te Atua, i whakahāwea ki te whakaaro o te Runga Rawa. 
Koia i pēhia iho ai e ia ō rātou ngākau ki te mahi; hinga iho rātou, kāhore hoki he kaiāwhina. 
Nā, ka tangi rātou ki a Ihowā i tō rātou pōuri; ā, ka whakaorangia rātou e ia i ō rātou mate. 
Whakaputaina mai ana rātou e ia i te pōuri, i te ātārangi o te mate; motumotuhia ana ō rātou here. 
Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata! 
Kua tukitukia hoki e ia ngā tatau parāhi; kua tapahia e ia ngā tūtaki rino, motu rawa. 
Ko ngā kūware, nā ā rātou mahi tutū, nā ō rātou kino, i pākia ai rātou. 
Ka wetiweti tō rātou wairua ki ngā kai katoa, ā, ka whakatata rātou ki ngā kūwaha o te mate. 
Nā, ka tangi ki a Ihowā i tō rātou pōuri, ā, ka whakaorangia rātou e ia i ō rātou mate. 
Tukua mai ana e ia tāna kupu, ā, rongoātia ana rātou; ā, whakaputaina ana rātou i ō rātou ngaromanga. 
Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata. 
Kia tukua anō e rātou te whakahere, arā te whakamoemiti; kia whakapuaki i āna mahi i runga i te hari. 
Ko te hunga e haere ana ki raro, ki te moana, i runga kaipuke, ā, e whai mahi ana i ngā wai nunui, 
ko rātou e kite i ngā mahi a Ihowā, i āna mahi whakamīharo i te rire. 
Puta kau tāna kupu, kua maranga te tūpuhi, māna e whakatūtū ōna ngaru. 
Ka kake rātou ki runga ki te rangi, ka heke anō ki raro ki te rire; ngohe noa ō rātou wairua i te pāwera; 
ka tiu rātou, ka hūrorirori ānō he tangata e haurangi ana; ā, kāhore he mahara i toe. 
Heoi, ka tangi ki a Ihowā i tō rātou hēmanawa; ā, whakaorangia ana rātou i ō rātou mate. 
Meinga ana e ia te tūpuhi kia marino, ōna ngaru kia māriri. 
Nā, ka koa rātou, nō te mea ka mārie, ā, ka kawea rātou e ia ki te tauranga i hiahia ai rātou. 
Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata! 
Kia whakanui hoki rātou i a ia i roto i te whakaminenga o te iwi, kia whakamoemiti ki a ia i roto i te nohoanga kaumātua. 
Ko ia hei mea i ngā awa hei koraha, i ngā pupūtanga wai hei oneone maroke, 
i te whenua whai hua, kia tītōhea, mō te hara o te hunga e noho ana i reira. 
Ko ia hei mea i te koraha hei hārotoroto wai, i te whenua maroke hei pupūtanga wai. 
Ā, whakanohoia iho e ia te hunga matekai ki reira, hanga ai i tētahi pā hei nohoanga; 
hei rui māra, hei whakatō māra wāina, e tupu ai, e maha ai ngā hua. 
Ko ia anō hei manaaki i a rātou, nō ka nui rawa; kāhore hoki e tukua kia torutoru haere ā rātou kararehe. 
Nā, kua iti haere anō rātou, kua piko i te tūkino, i te hē, i te pōuri, 
e ringihia ana e ia te whakahāwea ki runga ki ngā rangatira; e meinga ana kia hēhē i te ururua, i te wāhi kāhore nei he ara; 
otirā, kei te whakateitei ia i te rawakore ki runga i te mamae, kei te mea i ōna hapū kia rite ki te kāhui hipi. 
Ka kite ngā tāngata tika, ā, ka hari; ko ngā hē katoa hoki, kopia ake te māngai. 
Ko te tangata whakaaro nui ka mahara ki ēnei mea, ā, ka mōhio rātou ki te aroha o Ihowā. 
