﻿Waiata.
109.
Ki te tino kaiwhakatangi. He hīmene nā Rāwiri. E te Atua, e whakamoemiti nei ahau, kei wahangū koe. 
Kua puaki hoki te māngai o te tangata kino me te māngai o te tangata tinihanga, ki te hē mōku; he teka ō rātou arero, e kōrero nei mōku. 
I karapotia hoki ahau e rātou ki ngā kupu mauāhara, ā, i whawhai takekore ki ahau. 
Mō tōku aroha he riri tā rātou whakautu; ko ahau ia, he īnoi tāku. 
E hōmai ana e rātou ki ahau he kino mō te pai, he mauāhara mō tōku aroha. 
“Meinga he tangata kino hei rangatira mōna; kia tū he hoariri ki tōna ringa matau. 
Kia tau te hē ki a ia, ina whakawākia; kia waiho anō tāna īnoi hei hara. 
Kia torutoru ōna rā; kia riro tāna mahi tirotiro i tētahi atu. 
Kia pania āna tamariki, kia pouarutia hoki tāna wahine. 
Kia kōpikopiko noa āna tamariki, pīnono ai; kia rapu kai hoki mā rātou i ō rātou wāhi mokemoke. 
Kia haoa e te kaituku moni āna mea katoa; kia pāhuatia hoki e ngā tāngata iwi kē āna māuiuitanga. 
Kaua tētahi hei hoatu noa i te aroha ki a ia; kaua hoki tētahi hei atawhai i āna pani. 
Kia hātepea pūtia ōna uri; ā, i tō muri whakatupuranga kia horoia rawatia atu ō rātou ingoa. 
Kia maharatia e Ihowā te kino o ōna mātua; kei murua hoki te hara o tōna whaea. 
Kia mau tonu ki te aroaro o Ihowā; kia hātepea atu ai e ia te maharatanga ki a rātou i runga i te whenua. 
Mōna kīhai i mahara ki te mahi tohu; heoi, tūkino ana ia i te ware, i te rawakore, i te hunga ngākau marū, kia patua ai rātou. 
Āe rā, i pai ia ki te kanga, ā, kua tae mai ki a ia; kīhai ia i aro ki te manaaki, heoi kua mamao tērā i a ia. 
I kākahu ia i te kanga ki a ia, ānō ko tōna kākahu; nā, kua tae tērā ki roto ki a ia ānō he wai, me he hinu hoki ki roto ki ōna wheua. 
Waiho ki a ia hei kākahu hīpoki mōna, hei whītiki hoki e whītikiria tonutia ai ia.” 
Nā, hei utu tēnā mā Ihowā ki ōku hoariri, ki te hunga hoki e kōrero kino nei ki tōku wairua. 
Kia puta tāu mahi mōku, e te Atua, e te Ariki, he whakaaro ki tōu ingoa; nā te mea he pai tāu mahi tohu, whakaorangia ahau. 
He ware hoki ahau, he rawakore, kua mamae hoki tōku ngākau i roto i ahau. 
Ka riro ahau me te ātārangi e whakawairua kau ana; e peipeia ana ahau me he māwhitiwhiti. 
Hūrorirori kau ōku turi i te nohopuku; ā, e kohia ana te ngako o ōku kikokiko. 
Kua waiho ahau hei tāwainga mā rātou; ka kite rātou i ahau, ka rūrū ō rātou mātenga. 
Āwhinatia ahau, e Ihowā, e tōku Atua; kia rite ki tōu aroha tāu whakaora i ahau. 
Kia mātau ai rātou ko tōu ringa tēnei; ā, nāu tēnei, e Ihowā, i mea. 
Mā rātou e kanga, māu ia e manaaki; kia whakamā rātou ina whakatika; ko tāu pononga ia kia hari. 
Kia whakakākahuria ōku hoariri ki te whakamā, ā, ko tō rātou numinumi hei koroka hīpoki mō rātou. 
Ka tino whakawhetai tōku māngai ki a Ihowā; āe rā, ka whakamoemiti ahau ki a ia i waenganui o te mano. 
E tū hoki ia ki te ringa matau o te rawakore, hei whakaora i a ia i te hunga e whakahē ana i tōna wairua. 
