﻿Waiata.
111.
Whakamoemititia a Ihowā! Ka whakapaua tōku ngākau ki te whakawhetai ki a Ihowā, i te rūnanga o te hunga tika, i te whakaminenga. 
He nui ngā mahi a Ihowā, e whakatakina ana e te hunga katoa e manako ana ki aua mea. 
He mea hōnore, he mea korōria tāna mahi; tū tonu tōna tika ake ake. 
Kua meinga e ia kia maharatia āna mahi whakamīharo; he atawhai a Ihowā, he aroha. 
E hōmai ana e ia he kai mā te hunga e wehi ana ki a ia; ka mahara tonu ia ki tāna kawenata. 
Kua whakakitea e ia ki tāna iwi te kaha o āna mahi, i tāna hoatutanga i tō ngā tauiwi hei kāinga tupu mō rātou. 
Ko ngā mahi a ōna ringa he pono, he whakawā tika; pono tonu āna akoranga katoa. 
Ū tonu ake ake, e mahia ana i runga i te pono, i te tika. 
I tonoa mai e ia he whakaoranga mō tāna iwi; kua kīia iho e ia tāna kawenata mō ake tonu atu; he tapu tōna ingoa, e wehingia ana. 
Ko te tīmatanga o te whakaaro nui he wehi ki a Ihowā; he ngārahu pai tō te hunga katoa nāna ērā mahi. Ka mau te whakamoemiti ki a ia, ake ake. 
