﻿Waiata.
112.
Whakamoemititia a Ihowā! Ka hari te tangata e wehi ana i a Ihowā, e aro nui ana ki āna whakahau. 
Ka nui ōna uri ki runga ki te whenua; ka manaakitia te whakatupuranga o te hunga tika. 
Kei tōna whare te rawa, te taonga; ka pūmau tonu tōna tika, ake ake. 
Ka maea ake te mārama i roto i te pōuri ki te hunga tika; he atawhai ia, he aroha, he tika. 
He pono ka whiwhi painga te tangata he atawhai, he ohaoha tāna mahi; ka ū āna kupu i te whakawākanga. 
E kore hoki ia e whakangāueuetia ake ake; ka maharatia tonutia te tangata tika ake ake. 
E kore ia e mataku i te rongo kino; e ū ana tōna ngākau, e whakawhirinaki ana ki a Ihowā. 
Ka ū tōna ngākau, e kore ia e wehi; kia kite rā anō ia i tāna i hiahia ai ki ōna hoariri. 
Kua tuwhaina e ia, kua hoatu ki te hunga rawakore; pūmau tonu tōna tika ake ake; ka ara tōna haona i runga i te korōria. 
Ka kite te tangata kino, ā, ka pōuri; ka pakiri ōna niho, memeha iho; pirau iho te hiahia o te hunga kino. 
