﻿Waiata.
113.
Whakamoemititia a Ihowā! Whakamoemititia, e ngā pononga a Ihowā; whakamoemititia te ingoa o Ihowā. 
Kia whakapaingia te ingoa o Ihowā āianei ā ake ake. 
Kia whakamoemititia te ingoa o Ihowā i te putanga mai o te rā, ā tae noa ki tōna torengitanga. 
Kei runga rawa a Ihowā i ngā iwi katoa; kei runga ake i ngā rangi tōna korōria. 
Ko wai te rite ana ki a Ihowā, ki tō tātou Atua, kei runga nei tōna nohoanga, 
e whakaiti nei i a ia ki te titiro iho ki ngā mea kei te rangi, kei te whenua? 
E whakaara ake ana ia i te iti i roto i te puehu, e whakateitei ake ana i te rawakore i roto i te pūranga paru, 
kia whakanohoia ai e ia ki roto ki ngā rangatira, ki ngā rangatira o tāna iwi. 
Nāna hoki te pākoko i whai whare ai, hei whāereere e koa ana ki āna tamariki. Whakamoemititia a Ihowā! 
