﻿Waiata.
116.
E aroha ana ahau ki a Ihowā; mōna i whakarongo ki tōku reo, ki āku īnoi. 
I tahuri mai tōna taringa ki ahau; mō reira ka karanga ahau ki a ia i ahau e ora ana. 
I karapotia ahau e ngā whakawiringa a te mate; mau pū ahau i ngā mamae o te rēinga, i kite ahau i te pāwera, i te pōuri. 
Nā, ko tāku karangatanga ki te ingoa o Ihowā: “Tēnā rā, e Ihowā, whakaorangia tōku wairua!” 
He atawhai a Ihowā, he tika; āe, he aroha tō tātou Atua. 
E tiakina ana e Ihowā te hunga kūware; i whakaititia ahau, ā, nāna ahau i whakaora. 
E hoki, e tōku wairua, ki tōu okiokinga; kua atawhaitia hoki koe e Ihowā. 
Nāu hoki tōku wairua i whakaora kei mate, ōku kanohi kei whai roimata, ōku waewae kei paheke. 
Tērā ahau e hāereere i te aroaro o Ihowā i te whenua o te ora. 
I whakapono ahau, koia ahau i kōrero ai; “He nui tōku whakawhiunga.” 
I mea ahau i tōku ohoreretanga, “He teka kau ngā tāngata katoa.” 
He aha tāku e whakahoki ai ki a Ihowā mō āna atawhainga katoa i ahau? 
Ka mau ahau ki te kapu o te whakaoranga, ka karanga ki te ingoa o Ihowā. 
Ka whakamanā e ahau āku kupu taurangi ki a Ihowā i te aroaro o tāna iwi katoa. 
He mea utu nui ki tā Ihowā titiro te matenga o tāna hunga tapu. 
E Ihowā, he pono ko ahau tāu pononga; ko ahau tāu pononga, ko te tama a tāu pononga wahine; nāu i wewete ōku here. 
Ka tukua e ahau te patunga tapu, arā te whakawhetai; ka karanga ki te ingoa o Ihowā. 
Ka whakamanā e ahau āku kupu taurangi ki a Ihowā, āe, ki te aroaro o tāna iwi katoa, 
ki ngā marae o te whare o Ihowā, ki waenganui ōu, e Hiruhārama. Whakamoemititia a Ihowā! 
