﻿Waiata.
118.
Whakawhetai ki a Ihowā, he pai hoki ia; he pūmau tonu hoki tāna mahi tohu! 
Kia mea a Īharaira, “He pūmau tonu tāna mahi tohu.” 
Kia mea te whare o Ārona, “He pūmau tonu tāna mahi tohu.” 
Kia mea te hunga e wehi ana i a Ihowā, “He pūmau tonu tāna mahi tohu.” 
I karanga ahau ki a Ihowā i roto i te pōuri; i whakahoki kupu mai a Ihowā ki ahau, i whakatū hoki i ahau ki te wāhi whānui. 
Kei ahau a Ihowā; e kore ahau e wehi. He aha tā te tangata e mea ai ki ahau? 
Kei ahau a Ihowā kei roto i ōku kaiāwhina; nō reira tērā ahau e kite i tāku i hiahia ai ki te hunga e kino ana ki ahau. 
Ko te whakawhirinaki ki a Ihowā, pai atu i te whakaaro ki te tangata. 
Ko te whakawhirinaki ki a Ihowā, pai atu i te okioki ki ngā rangatira. 
I karapotia ahau e ngā iwi katoa; ka ngaro rātou i ahau i runga i te ingoa o Ihowā! 
I karapotia ahau e rātou, āe, i karapotia ahau e rātou; ka ngaro rātou i ahau i runga i te ingoa o Ihowā! 
Me te mea he pī rātou e mui ana ki ahau; kua pirau rātou ānō he ahi tātarāmoa; i ngaro hoki rātou i ahau i runga i te ingoa o Ihowā! 
Kaha pū tāu turaki i ahau, kia hinga ai ahau, nā Ihowā ia ahau i āwhina mai. 
Ko Ihowā tōku kaha, tāku hīmene; ko ia anō tōku whakaoranga. 
He reo hari, he reo whakaoranga, kei ngā tapenākara o te hunga tika; “He māia ngā mahi a te ringa matau o Ihowā. 
Kua whakanuia te matau o Ihowā; he māia ngā mahi a te ringa matau o Ihowā.” 
E kore ahau e mate, engari tērā ahau e ora, hei whakapuaki i ngā mahi a Ihowā. 
I pākia rawatia ahau e Ihowā, otiia, kīhai ahau i tukua e ia kia mate. 
Whakatuwheratia ki ahau ngā kūwaha o te tika, ka tomo ahau ki roto, ka whakamoemiti ki a Ihowā. 
Ko te kūwaha tēnei o Ihowā; ka tomo te hunga tika ki reira. 
Ka whakamoemiti ahau ki a koe, mōu i whakahoki kupu mai ki ahau, kua meinga hoki ko koe hei whakaora mōku. 
Ko te kōhatu i kapea e ngā kaihanga, kua meinga hei upoko mō te kokonga. 
Nā Ihowā tēnei; he mea mīharo ki ō tātou kanohi. 
Ko te rā tēnei i hangā e Ihowā kia whakamanamana, kia koa tātou i reira. 
Whakaorangia rā āianei, e Ihowā! Tēnā rā, e Ihowā, hōmai he ngahuru ki a mātou. 
Kia whakapaingia te tangata e haere mai ana i runga i te ingoa o Ihowā. Kua whakapaingia koutou e mātou i roto i te whare o Ihowā. 
Ko Ihowā te Atua, ā, nāna i hōmai te mārama ki a tātou. Herea te patunga tapu ki ngā aho, ki ngā haona rā anō o te āta. 
Ko koe tōku Atua, māku koe e whakamoemiti; tōku Atua, māku koe e whakanui. 
Whakawhetai ki a Ihowā; he pai hoki ia, he pūmau tonu tāna mahi tohu. 
